«Հայաստանն ինտեգրվել է անձնական տվյալների պաշտպանություն իրականացնող միջազգային կառույցներին»,-Խոսքի ազատության պաշտպանության կոմիտեի եւ «Բաց հասարակության հիմնադրամներ-Հայաստան»-ի կազմակերպած՝ «Անձնական տվյալների պաշտպանությունը Հայաստանում ու Վրաստանում. մարտահրավերներ եւ գործողությունների գերակա ուղղություններ» թեմայով քննարկման ժամանակ լրագրողներին ասաց ՀՀ արդարադատության նախարարության Անձնական տվյալների պաշտպանության գործակալության պետ Շուշան Դոյդոյանը:
Ամփոփելով կառույցի գործունեության մեկ տարվա ձեռքբերումները՝ նա նշեց, որ որոշակի ոլորտներ որպես առաջնահերթ են դիտարկել. «Տեսահսկման ոլորտում ընդունել ենք համապարփակ ուղեցույց, որը չունի պարտադիր կատարման պահանջ, բայց իրենից ներկայացնում է խորհրդատվություն, որին պետք է հետեւի տեսահսկում իրականացնող յուրաքանչյուր անձ»,-տեղեկացրեց Շուշան Դոյդոյանը:
Մյուս ոլորտը, ինչպես նշեց նա, անցանկալի հաղորդագրություններն են. «Անձն իր բջջային հեռախոսահամարին չպետք է ստանա որեւէ տեսակի առեւտրային բնույթի հաղորդագրություն, եթե դրա համաձայնությունը չի տվել, իսկ եթե տվել է, այն հետ կանչելու հնարավորություն պետք է ունենա: Այս առնչությամբ մշակել ենք օրենքի նախագիծ, որն այս պահին կառավարությունում է»:
Կարդացեք նաև
Անչափահասների անձնական տվյալների պաշտպանությունը եւս չափազանց կարեւոր է: Այս դեպքում եւս ԱՏՊԳ-ն մշակել է համապարփակ ուղեցույց, որն ընդունման փուլում է: Շուշան Դոյդոյանը նաեւ հայտնեց, որ այս պահին ՌԴ-ում ՀՀ քաղաքացիների տվյալների պաշտպանությանն ուղղված մեկ վարույթ կա. «Ռուսական կայքում հրապարակվել էին ՀՀ քաղաքացիների անձնական տվյալներ, այդ թվում՝ անձնագրի տվյալներ, հեռախոսահամարներ: Դիմել ենք Ռուսաստանի մեր գործընկերոջը՝ «Ռոսկոմնադզոր»-ին եւ խնդրել աջակցություն՝ այդ կայքի մատչելիությունը սահմանափակելու եւ այդ տվյալներն արգելափակելու խնդրանքով: Այս պահին գործը ռուսաստանյան դատարանում է»:
Քննարկմանը ներկա Վրաստանի անձնական տվյալների պաշտպանության տեսուչ Թամար Կալդանին էլ իր հերթին նշեց, որ Վրաստանում էլ անձնական տվյալների պաշտպանության ոլորտում գրեթե նույն խնդիրները կան, եւ նա ցանկանում է ուսումնասիրել հայաստանյան փորձը:
Լուիզա ՍՈՒՔԻԱՍՅԱՆ
