Դեկտեմբերի 6-ին «Տեսակետ» մամուլի ակումբում «Ազգային անվտանգություն» կուսակցության նախագահ Գառնիկ Իսագուլյանը հայտարարեց, որ չպետք է ուշադրություն դարձնել Ադրբեջանի նախագահ Իլհամ Ալիեւի ռազմատենչ հայտարարություններին, թե խաղաղ ճանապարհով կվերադառնա Երեւան միայն այն ժամանակ, երբ Հայաստանը կհայաթափվի:
«Ալիեւի երազանքներն այլ մակարդակում են: Նա կարող է խաղաղ ճանապարհով գալ Հայաստան, երբ Բաքուն չի լինի Ադրբեջանի մայրաքաղաք ու ինքը կգա կապիտուլյացիայի պայմանագիր ստորագրելու: Մենք կերաշխավորենք նրա կյանքը»,-հեգնեց բանախոսը:
Նա նաեւ հավելեց, որ Հայաստանում չպետք է լուրջ ուշադրություն դարձնել Ալիեւի այդ կարգի հայտարարություններին:
Ասուլիսի ժամանակ անդրադարձ եղավ նաեւ ԵԱՀԿ նախարարների՝ Համբուրգում կայանալիք խորհրդի նիստին ու Հայաստանի և Ադրբեջանի նախարարների հանդիպման նպատակահարմարությանը:
Գառնիկ Իսագուլյանի ձեւակերպմամբ, մենք պետք է սպասենք ԱՄՆ ադմինիստրացիայի փոփոխությանը, բացի այդ, նրա խոսքերով, այս շրջանում անգամ ԵՄ ազդեցիկ երկրները՝ Գերմանիան, Ֆրանսիան, Իտալիան են խառնաշփոթ վիճակում:
Կարդացեք նաև
«Եվրամիության նախարարների խորհուրդը հիմա անգամ ԵՄ խնդիրների վերաբերյալ չի կարողանում իր հստակ դիրքորոշումը հայտնել, ի՞նչ կարող է ասել ԼՂ հիմնախնդրի վերաբերյալ»,- շեշտեց բանախոսը: Ըստ նրա՝ տարածաշրջանով հիմնական խաղացողները, ըստ էության, Ռուսաստանն ու ԱՄՆ-ն են:
Գոհար ՀԱԿՈԲՅԱՆ
