Նա անմեղսունակ է ճանաչվել
2016թ. oգոստոսի 4-ի վաղ առավոտյան Նոյեմբերյանի բժշկական կենտրոնից ոստիկանություն հաղորդագրություն էր ստացվել, որ շտապ օգնության ծառայության բժիշկները կանչով մեկնել են Նոյեմբերյանի տարածաշրջանի Կողբ գյուղի բնակիչ, 1955թ. ծնված Արտաշես Աբգարյանի տուն, որտեղ իմանալով, որ վերջինիս որդին հրազենով կրակել է հոր վրա, վախեցել են տուն մտնել:
Կողբ մեկնած ոստիկանության օպերատիվ խումբը պարզել էր, որ Արտաշես Աբգարյանի որդին՝ 1991թ. ծնված Սարո Աբգարյանը նախկինում հոր հետ կենցաղային հարցերի վերաբերյալ լարված հարաբերություններ է ունեցել եւ այդ օրն իրենց տան պատշգամբում, իրեն ամրակցված «ԻԺ-58» 16 մմ տրամաչափի երկփողանի որսորդական հրացանով կրակել է հոր վրա, որը տեղում մահացել է: Սարո Աբգարյանը ոստիկանություն բերման է ենթարկվել:
Սպանության հոդվածով հարուցված քրեական գործի քննությունը կատարում էր ՀՀ քննչական կոմիտեի Տավուշի մարզային վարչությունը: Ս. Աբգարյանի նկատմամբ նշանակվել էր դատահոգեբուժական փորձաքննություն, որպեսզի պարզվի՝ նա մեղսունա՞կ է, թե՝ ոչ: Փորձաքննությունը ստացիոնար էր, Ս. Աբգարյանը գտնվում էր «Նորք» հոգեբուժական կենտրոնում:
Կարդացեք նաև
ՀՀ քննչական կոմիտեի Տավուշի մարզային վարչությունից տեղեկացանք, որ կատարված դատահոգեբուժական փորձաքննության եզրակացությամբ՝ Սարո Աբգարյանը ճանաչվել է անմեղսունակ, նրա նկատմամբ բժշկական բնույթի հարկադրանքի միջոց կկիրառվի:
Ոսկան ՍԱՐԳՍՅԱՆ
