Լրատվամիջոցների ներկայացուցիչների հետ վարչապետ Կարեն Կարապետյանի այսօրվա հանդիպման ընթացքում «Առավոտը» հարց ուղղեց, թե արդյոք տնտեսության վիճակի վերաբերյալ տարբե՞ր են իր եւ ՀՀ նախագահի պատկերացումները:
Հիշեցնենք, որ վարչապետ նշանակումից հետո՝ սեպտեմբերին Կարեն Կարապետյանը հայտարարել էր. «Բաց, ազնիվ ասում եմ, ռեալ մեր տնտեսության վիճակը չափազանց ծանր է»:
Մինչդեռ նոյեմբերին ՀՀԿ համագումարում ՀՀ նախագահ Սերժ Սարգսյանը հայտարարեց. «Հայաստանի տնտեսության, այսպես ասած, «իմունիտետը» շատ է փոխվել այս տարիների ընթացքում։ Մեզ հաջողվել է զարգացնել բոլոր այն ինստիտուտները, որոնք զսպանակի նման աշխատելով, կարողանում են լրջորեն մեղմել արտաքին աշխարհից եկող ուժեղ բացասական ալիքները և չթողնել, որ դրանք անխոչընդոտ հասնեն մարդկանց, հասնեն ընտանիքներ։ Հենց այդ՝ անընդհատ ավելացող ամրության պաշարն է նաև, որ մեզ թույլ տվեց առաջանցիկ աճ ապահովել։ Մասնավորապես, 2007-2015 թվականներին Հայաստանն ապահովել է 29.3 տոկոս իրական տնտեսական աճ, իսկ Արժույթի միջազգային հիմնադրամի գնահատականներով՝ 32 տոկոս աճ, մինչդեռ նույն ԱՄՀ տվյալներով Եվրոպայում այդ ժամանակահատվածում արձանագրվել է 8.9 տոկոս աճ (ընդ որում՝ Արևմտյան Եվրոպայում՝ 5.7 տոկոս աճ, Արևելյան Եվրոպայում՝ 17.2 տոկոս աճ), իսկ ԱՊՀ-ում՝ 22.4 տոկոս աճ։ Հայաստանը վերջին 9 տարիներին շարունակել է զարգանալ` միաժամանակ դիմագրավելով այնպիսի տնտեսական ցնցումների, որոնք երբեմն համեմատվում են նախորդ դարի երեսնականների մեծ դեպրեսիայի հետ»:
Վարչապետն այսպես արձագանքեց մեր հարցադրմանը. «Նախագահի հետ այսօր մեր աշխատանքը կառուցվում է հետեւյալ կերպ, որ տնտեսական բլոկում մեր այսօրվա թիմն ունի ազատության աստիճան՝ որոշում կայացնելու: Տնտեսական առումով մեր պատկերացումները տարբեր են, մակրո առումով՝ չէ: Կարող են լինել հարցեր, որ մենք տարբեր ձեւով նայենք, եւ դա նորմալ է, տրամաբանական է: Նույն մեր թիմի մեջ՝ ես մի ձեւ կարող եմ նայել, մեկ այլ նախարար մեկ ուրիշ ձեւ, ու դրա շուրջ բանակցենք»:
Կարդացեք նաև
«Երևանի ավագանու «Բարև Երևան» խմբակցությունն այսօր հրապարակած հաղորդագրությունում դժգոհել էր, թե վարչապետին ուղղված բաց նամակում առաջարկել էր ծառայողական ավտոմեքենաների մեծ մասը վերադարձնել պետությանը ու չէր ստացել ոչ մի պատասխան: Նամակն անպատասխան թողնելու պնդումը հիշատակելով՝ «Առավոտը» հիշեցրեց նաեւ դժգոհությունները, որ վարչապետ նշանակվելիս էլ չէր հանդիպել ընդդիմադիր խմբակցությունների հետ: Հարցին, թե արդյոք ընդդիմադիր քաղաքական ուժերին անտեսելը դառնալո՞ւ է գործելակերպ՝ Կարեն Կարապետյանը պատասխանեց. «Ճիշտն ասած, ես նման հատուկ խնդիր էլ չէի դրել: Երբ որ կառավարության ծրագիրը ներկայացվում էր, ու ասացին՝ դուք ինչի՞ չեք հանդիպել… Ես ինչքան գիտեմ՝ նման պարտադիր պայման չկար: Ավելին՝ մտքովս չէր էլ անցնում, որ պետք է հանդիպեմ: Ոչ թե այն պատճառով, որ դա ավելորդ է՝ ուղղակի այսպես արարողակարգային կամ ռեգուլյատիվ չէի մտածում այդ մասին: Բայց ես ծրագիրը գրելու ժամանակ բազմաթիվ ընդդիմադիր քաղաքական գործիչների հետ եմ հանդիպել: Ես հանդիպել եմ՝ ինձ ներառած, տասը վարչապետների հետ, որոնց հետ քննարկել եմ ծրագրերը եւ այլն: Այսինքն՝ նման խնդիր չկար»:
