ՀՀ Վերաքննիչ քրեական դատարանում այսօր հետաձգվեց Ավետիսյանների ընտանիքի սպանության գործով Շիրակի մարզի ընդհանուր իրավասության դատարանի՝ 2016 թ. օգոստոսի 23-ի վճռի դեմ ներկայացված վերաքննիչ բողոքի քննությունը:
Դատավորները գտան, որ նիստին չներկայացած՝ տուժողի իրավահաջորդի ներկայացուցիչ Արթուր Սաքունցը գուցե այլ միջնորդություններ ունի: Հաջորդ դատական նիստը նշանակվեց դեկտեմբերի 16-ին, ժամը 15:00-ին:
Aravot.am-ի հետ զրույցում նշյալ գործով տուժողի իրավահաջորդի ներկայացուցիչ, փաստաբան Երվանդ Վարոսյանն ասաց. «Բողոքի քննությունն, ըստ էության, ավարտված է, կարծում եմ՝ հաջորդ նիստին դատարանը կանցնի խորհրդակցական սենյակ: Շիրակի մարզի ընդհանուր իրավասության դատարանի որոշումը հիմնավոր է մեղադրանքի մասով, սակայն անհիմն է՝ տուժողի իրավահաջորդների քաղաքացիական հայցը վարույթ չընդունելու մասով: Մենք ընդդեմ Ռուսաստանի քաղաքացիական հայց էինք ներկայացրել, որը դատարանը հրաժարվեց վարույթ ընդունել»:
Հետաքրքրվեցինք՝ Վալերի Պերմյակովի՝ բողոքի քննությանը ներկա չլինելը որեւէ կերպ չխոչընդոտե՞ց քննության ընթացքին: «Իհարկե, ցանկալի կլիներ, որ նա ներկա լիներ, սակայն դատավարության այն փուլում ենք, որ ոչ մեկ նրան, ցավոք, ստիպողաբար չի կարող բերել դատարան: Եթե հրաժարվել է՝ իր գործն է, դրանում տարօրինակ բան չկա, որովհետեւ առաջին ատյանի դատարանում նրա վարքագիծը հուշում էր՝ կարծես թե իրեն մեկ է՝ ի՞նչ կլինի»:
Կարդացեք նաև
Լուիզա ՍՈՒՔԻԱՍՅԱՆ
