2016թ. մարտի 18-ին իրանցիները
ժամանել էին Հայաստան՝ «Նովրուզը» նշելու
Իրանի Իսլամական Հանրապետության քաղաքացի Ջավադ Վալիզադեն դիմել է վերաքննիչ քրեական դատարան, խնդրելով, որպեսզի փոփոխվի իրեն 3 տարի 6 ամիս ժամկետով ազատազրկման դատապարտելու վերաբերյալ Կենտրոն եւ Նորք-Մարաշ վարչական շրջանների ընդհանուր իրավասության դատարանի սեպտեմբերի 1-ի դատավճիռը եւ իրեն մեղսագրվող արարքում ճանաչել ոչ միայն անմեղ, այլ կայացնել արդարացման դատավճիռ: Նրա նկատմամբ մեղադրանք առաջադրող մարմինը ընտրել էր խափանման միջոց չհեռանալու մասին:
Ջավադ Վալիզադեն վերաքննիչ բողոքում խնդրել է, եթե իրեն չեն արդարացնելու, ապա նշանակեն համաչափ մեղմ պատիժ եւ պատիժն էլ պայմանականորեն չկիրառել:
Իրանցին մեղադրվել էր այս տարվա մարտի 20-ին Երեւանի վարձակալած բնակարանի հյուրասենյակում տեղի ունեցածի համար:
Ըստ մեղադրանքի կողմի, նա գտնվելով ալկոհոլի ազդեցության տակ, վիճաբանել է իր հորեղբորորդի, տուժող Հոսեին Վալի Վալիզադեի հետ։ Հոսեինը նույնպես Իրանի քաղաքացի է: Վիճաբանության ժամանակ երկուստեք փորձել են միմյանց մարմնական վնասվածքներ հասցնել, մասնավորապես, տուժողը ճանկռել է Վալիզադեի դեմքը, պատճառելով ճանկռվածքներ, իսկ ամբաստանյալն էլ սուր ծայր ունեցող առարկայով հարվածել է տուժողի պարանոցի շրջանին` նրա առողջությանը պատճառելով կյանքին վտանգ սպառնացող ծանր վնաս` աջ վերանրակային շրջանի կրծքավանդակի խոռոչ թափանցող ծակած վերք, որն ուղեկցվել է ենթամաշկային էմֆիզեմայով եւ աջակողմյան պնեւմոթորաքսով։
Կարդացեք նաև
Նկատենք, որ նախաքննական մարմինը քրեական հետապնդում չի իրականացրել` տուժողի բողոքի բացակայության պատճառաբանությամբ։
Ի դեպ, առաջին ատյանի դատարանում Ջավադ Վալիզադեն իրեն մեղավոր չի ճանաչել, չի ընդունել Հոսեինին սուր գործիքով հարված հասցնելու հանգամանքը` պատճառաբանելով, որ ծակած վերքը վերջինս ստացել է բազմոցի հենակի վրա վայր ընկնելու հետեւանքով։
Ամբաստանյալի դատաքննության ժամանակ տված ցուցմունքի համաձայն, իրենք Հայաստանում են գտնվել «Նովրուզը» նշելու կապակցությամբ:
Շրջագայել են Երեւանի տեսարժան վայրերով, ապա իրենց վարձակալած բնակարանի հյուրասենյակում հորեղբորորդու եւ երկու ընկերների հետ սկսել են ոգելից խմիչք գործածել։ Նշել էր, թե սեղանին կար միայն հյութեր եւ խմիչք, որեւէ սուր գործիք չի եղել։
Ամբաստանյալը նաեւ հայտնել էր, թե իրենց միմյանց ճանկռելու շարժառիթը եղել է այն բանից հետո, երբ հանդիմանել է տուժողին խմիչքի չարաշահման համար:
Հոսեինի հետ ընդհարումն առաջացել է այն բանից հետո, երբ նա խմիչքը չարաշահել է, որի կապակցությամբ նրան հանդիմանել է. «Միմյանց չեն հայհոյել, ինքը Հոսեինին չի հարվածել, շատ մոտ էին կանգնած, ինքը մի պահ հետ է քաշվել, որից հետո Հոսեինը կորցրել է հավասարակշռությունը եւ ընկել է։ Կանգնել է Հոսեինի գլխավերեւում եւ հետաքրքրվել, թե ինչ է պատահել։ Հոսեինը պատասխանել է, որ գլուխն է ցավում, որից հետո բնակարանի տիրոջ օգնությամբ շտապօգնություն են կանչել եւ Հոսեինին տեղափոխել հիվանդանոց, թեեւ շատ անհանգիստ էր, սակայն ընկերների խորհրդով ինքը հիվանդանոց չի գնացել, մնացել է բնակարանում։ Այնուհետեւ, գնացել է ծխախոտ գնելու, երբ վերադարձել է, տան մոտ հանդիպել է ոստիկանության աշխատակիցներին, ովքեր իրեն հրավիրել են ոստիկանության բաժին, որտեղ եւ տեղեկացել է Հոսեինի ստացած մարմնական վնասվածքի մասին»։
Հոսեինի պարանոցի եւ ուսի վնասվածքը չի էլ նկատել, այդ մասին տեղեկացել է միայն ոստիկանությունում։
Դատարանում ամբաստանյալը հայտնել էր, որ իր առաջին հարցաքննությանը ներկա գտնված թարգմանչի եւ պաշտպանի աշխատանքից դժգոհ է եղել, դեռ նախաքննությունն ավարտելուց հետո թարգմանչին խնդրել է ամբողջությամբ ընթերցել ցուցմունքները, սակայն մի քանի էջ կարդալուց հետո բողոքել է, որ նման բան ինքը չէր հայտնել։
Ի դեպ, վիճաբանությունը դադարեցվել է իրենց երկու ընկերների միջամտության արդյունքում, ովքեր կողմերին հանդարտեցրել են։
Տուժող Հոսեինը դատարանում հայտնել էր, թե Հայաստան ժամանելու երրորդ օրը` բնակարանի հյուրասենյակում ընկել է հատակին, որի հետեւանքով դիպչել է սեղանին, պարանոցին ստացել ոչ մեծ վնասվածք։ Հայտնել էր, որ ինքն ու իր հորեղբորորդին չեն վիճել, միմյանց չեն հարվածել, այլ կատակ են արել, որը գնալով լրջացել է։ Ընկնելու հետեւանքով մարմնական վնասվածքը ստանալուց հետո նրա ինքնազգացողությունը վատացել է, հրավիրել են «Շտապօգնության» աշխատակիցների, ովքեր եւ իրեն տեղափոխել են թիվ 1 համալսարանական հիվանդանոց։
Վկաներից մեկը դատարանում հայտնեց, որ բնակարանում արյան հետքեր, սեղանին էլ դանակ չի նկատել, Հոսեինի վրա վնասվածքներ չեն եղել։
Մեկ այլ վկա էլ, ով այդ օրը գնացել է տունը մաքրելու, նկարագրեց տուժողի հագուստը. տուժողի հագին եղել է սպիտակ վերնաշապիկ, իսկ պարանոցի աջ հատվածում նկատել է վնասվածք. «Բնակարանում կոտրված ոչինչ չի եղել, սեղանին եղել է խմիչք, սենյակում արյան հետքեր չի նկատել»։
Իրանցի բաժանարարներն էլ հայտնել էին, թե ապահովության համար են զանգել շտապօգնություն, երբ տեսել են իրենց ընկերը ընկել է հատակին:
Վկաներից մեկն էլ իր նախաքննության եւ դատաքննության ժամանակ տրված ցուցմունքի հակասությունները փորձել էր բացատրել «քննիչի մոտ թարգմանիչն է իր ցուցմունքը թելադրել, որն ինքն այնուհետեւ ստորագրել է» պատճառաբանությամբ։
ՌՈՒԶԱՆ ՄԻՆԱՍՅԱՆ
«Առավոտ»
03.12.2016
