Մի խումբ լրագրողների՝ Տավուշի մարզ կատարած այցի ընթացքում այսօր ՀՀ ՊՆ մամուլի խոսնակ Արծրուն Հովհաննիսյանն անդրադարձավ իրավապաշտպան Արթուր Սաքունցի՝ օրերս ամառային զորակոչի առնչությամբ հրապարակված զեկույցին՝ ասելով, որ ՊՆ-ում համապատասխան ուսումնասիրություն կատարելուց հետո պատասխան կտրվի: «Ինչ դիմում մինչ օրս մեզ ուղարկվել է Հելսինկյան քաղաքացիական ասամբլեայի կողմից, չեմ հիշում, որ պատասխան տրված չլինի: Այս զեկույցն էլ անպատասխան չենք թողնի»,-վստահեցրեց Արծրուն Հովհաննիսյանը:
Նա անդրադարձավ նաեւ Հելսինկյան քաղաքացիական ասամբլեայի Վանաձորի գրասենյակի՝ ապրիլյան դեպքերի ժամանակ զինծառայողների մահվան հանգամանքների առնչությամբ կազմած զեկույցին՝ այն որակելով ոչ պրոֆեսիոնալ: Նշյալ զեկույցի պատասխանը եւս ՊՆ-ն ուսումնասիրություններից հետո կհրապարակի:
ՊՆ խոսնակը սակայն նկատեց, որ ասամբլեան որոշ դեպքեր մեկնաբանել է զգացմունքային ֆոնի վրա:
Արծրուն Հովհաննիսյանը մատնանշեց նաեւ տանկերում վառելիքի բացակայության մասին ասամբլեայի հրապարակումը՝ նշելով. «Տանկից հնարավոր չի մինչեւ վերջ վառելիք թափել: Որքան էլ թափես՝ 40-60 լիտր մնում է, որով տակը երկու օր կաշխատի»:
Կարդացեք նաև
Մեկ այլ օրինակով Արծրուն Հովհաննիսյանը մատնանշեց՝ ոլորտին քաջատեղյակ մարդիկ գիտեն, որ զրահատեխնիկայի ոչնչացման դեպքում զինվորի աճյունը ամբողջական պահպանված լինելու խնդիր կա:
Լուիզա ՍՈՒՔԻԱՍՅԱՆ
