Մոտ 81 000 բնակչություն ունեցող Տոլեդոն Իսպանիայի պատմական քաղաքներից է, ժամանակին եղել է եպիսկոպոսական նստավայր եւ հոգեւոր կենտրոն: Այն Կաստիլիա-Լա Մանչայի մայրաքաղաքն է ու ՅՈՒՆԵՍԿՕ-ի համաշխարհային ժառանգության ցանկում է:
Նեղլիկ փողոցներով գողտրիկ այս քաղաքում բազմաթիվ են մշակութային հուշարձաններն ու հնագույն շինությունները: Դրանց թվում են գոթական ոճով կառուցված, բայց նաեւ մավրիտանական էլեմենտներ կրող Սուրբ Մարիամի տաճարը (Catedral Primada Santa Marվa de Toledo), հռոմեական ամֆիթատրոնի ավերակները, Էլ Գրեկոյի աշխատանքների թանգարանը, Սան Սերվանդոյի ամրոցը եւ այլն:
Տոլեդոն հիմնականում կապվում է հունական արմատներով իսպանացի նկարիչ Էլ Գրեկոյի անվան հետ, որն այս քաղաքում է ապրել 1577-ից մինչեւ 1614 թթ. եւ հենց Տոլեդոյում էլ արարել է իր գլուխգործոցներից շատերը, մասնավորապես՝ «Կոմս Օրգասի թաղումը»:
Տոլեդոյի մարգարիտը Սուրբ Մարիամի տաճարն է, որն այժմ ծառայում է որպես թանգարան: Այստեղ պահպանվում են համաշխարհային այնպիսի մեծությունների գործեր, որոնց թվում են Էլ Գրեկոն, Տիցիանը, Կարավաջոն, Վելասկեսը եւ Գոյան:
Սուրբ Մարիամի տաճարը հոյակապ ճարտարապետական հորինվածք ունի, որի ճակատային մասում, այսպես կոչված, «ապաշխարանքի դարպասներն» են գտնվում: Ըստ ավանդույթի, մարդիկ այդ դարպասներին հպվելով՝ մեղքերի թողություն են ստանում: Տաճարի կենտրոնական մասում էլ հոգեւոր երգչախմբի համար նախատեսված հատվածն է գտնվում, որտեղ տեղադրված աթոռներից յուրաքանչյուրը հոգեւոր թեմայով որեւէ քանդակ ունի:
Կարդացեք նաև
Այս տաճարը առանձնահատուկ է նրանով, որ լինելով բացառիկ կառույց՝ միաժամանակ իր ներսում կրում է բազմաթիվ գեղանկարչական եւ ոսկերչական արժեքներ:
Տոլեդոն զբոսաշրջիկների համար կատարյալ վայր է. այստեղ ոչ միայն կարելի է գեղագիտական հաճույք ստանալ, այլեւ հանգստանալ գողտրիկ սրճարաններում ու ինքնատիպ հուշանվերներ ձեռք բերել կրպակներից: Մարդիկ էլ բարեհամբույր են ու պատրաստակամ օգտակար լինելու:
ԳՈՀԱՐ ՀԱԿՈԲՅԱՆ
Լուսանկարները՝ հեղինակի:
«Առավոտ»
02.12.2016
