Այսօր մի շարք կազմակերպություններ ներկայացրեցին Հայաստանում ԼԳՊՏԻ՝ լեսբի, գեյ, բիսեքսուալ, տրանսգենդեր, ինտերսեքս անձանց մարդու իրավունքների իրացման համապարփակ ռազմավարությունը, որն ուղղված է, ինչպես ռազմավարության գրքույկում է գրված, Հայաստանում բնակվող ԼԲԳՏԻ անձանց նկատմամբ խտրականության եւ չարաշահումների դեմ պայքարին:
Մինչ ռազմավարության ներկայացնելը, Հայաստանում ԵՄ պատվիրակության միջազգային համագործակցության բաժնի աշխատակից Լինե Ուրբանն ասաց, որ ԵՄ պատվիրակությունը շատ ուրախ է այս նոր ռազմավարության համար, որովհետեւ կարծում են, որ ԼԳԲՏԻ համայնքի համար Հայաստանում կարեւոր է, տիկին Ուրբանի խոսքերով ասած՝ այս առաջընթացը ներմուծել:
«Մենք կարծում ենք՝ մի քանի հարցեր կան, որոնք շատ կարեւոր են Հայաստանի համար եւ կարծում եմ, մենք՝ ԵՄ-ն կցանկանար, որպեսզի ԼԳԲՏԻ համայնքի դեմ բռնություններին, ոտնձգություններին եւ ֆիզիկական ոտնձգություններն անհատների նկատմամբ՝ վերջ տրվեն հնարավորինս շուտ: Մենք սա դիտարկում ենք գլխավոր մտահոգություն՝ մարդու իրավունքների առումով: Ֆիզիկական բռնություն, ատելության քարոզ, ատելության խոսք՝ այն խնդիրներն են, որոնք մենք համարում ենք ամենակործանարարը համայնքի համար»:
Կարդացեք նաև
Տիկին Ուրբանն անդրադառնալով խտրականության դեմ օրենքի նախագծին, ասաց, որ հուսով է այս մարմինը կաջակցի օրենքի կիրարկմանը եւ այն մարդկանց իրավունքների պաշտպանությանը, որոնք գտնում են, որ իրենց նկատմամբ խտրականություն է դրսեւորում:
«Հասարակություն առանց բռնության հ/կ-ի ներկայացուցիչ Լիդա Մինասյանն էլ ներկայացրեց «Հայաստանում ԼԳԲՏԻ անձանց իրավունքների գործնական գնահատում» հետազոտությունը: Մինասյանի խոսքերով՝ տարբեր հարցումներ են իրականացվել, ուսումնասիրվել է նաեւ օրենսդրական դաշտը:
Ըստ հետազոտության՝ Հայաստանում խնդրի պատմական եւ սոցիալական համատեքստը՝ պատմականորեն ազգային ինքնությունը փրկելու խնդիրը դարեր շարունակ արդիական է, հայոց հետերոսեքսուալ ինքնության կերտումը մասամբ նաեւ կախված է էթնիկ ինքնության, կրոնի եւ Հայ Առաքելական եկեղեցու շաղկապումից, արժանապատվության ու հավասարության իրավունքի պահանջը որպես մարտահրավեր սոցիալական նորմերին:
Այլ մանրամասները՝ տեսանյութում
Արման Աղաջանովն էլ ներկայացրեց մի հետազոտության արդյունքներ՝ ԼԳԲՏԻ անձանց նկատմամբ հավասարության, հասարակական վերաբերմունքի մասին:
«Բնակչության մոտ 21 %-ը կարծում է, թե գիտնակաները դեռեւս չունեն հստակ պատասխան՝ ինչպես են ձեւավորվում սեռական կողմնորոշումը, գենդերային ինքնությունը: Տարածված կարծրատիպերը հասարակության մեջ որ կան այն է, որ գեյերի մասին կա ավելի ուժեղ կարծրատիպեր, լեսբիների մասին՝ ավելի թեթեւ մեղմ: Օրինակ Հայաստանի բնակչության 66%-ը կարծում է, որ նույնասեռական տղամարդիկ սեփական արտաքինին եւ նորաձեւությանը մեծ ուշադրություն են դարձնում, 56%-ը կարծում է ՄԻԱՎ տարածողներն են: Լեսբիների մասին այլ է պատկերը. 48%-ը կարծում է՝ նրանք ատում են տղամարդկանց»,-ներկայացրեց Աղաջանովը:
Հետազոտության այլ մանրամասները՝ տեսանյութում
Ռազմավարությունում սահմանված են, թե որ ոլորտում ինչ քայլեր պետք է արվեն ԼԳԲՏԻ անձանց իրավունքների պաշտպանության, հավասարության համար:
Նելլի ԲԱԲԱՅԱՆ
