Արցախի Հանրապետության վարչապետ Արայիկ Հարությունյանը դեկտեմբերի 2-ին, շրջանային վարչակազմերի ղեկավարների և աշխատանքի ու սոցիալական հարցերի նախարարի մասնակցությամբ, աշխատանքային խորհրդակցություն է անցկացրել:
ԱՀ աշխատանքի ու սոցիալական հարցերի նախարար Սամվել Ավանեսյանը վարչապետին ներկայացրել է, որ «Դիակոնիա» բարեգործական հիմնադրամը չորս և ավելի երեխաներ ունեցող ընտանիքներին հատկացրել է նվերներ՝ սննդամթերքի, ծածկոցների և կենցաղային քիմիայի տեսքով: Ս. Ավանեսյանի խոսքով, շրջանների վարչակազմերի օգնությամբ արդեն առաջիկա օրերին այն կհասցվի հասցեատերերին, սակայն նվերների քանակը չի բավականացնի Ստեփանակերտի և Շահումյանի շրջանի բազմազավակ ընտանիքներին:
Կառավարության ղեկավարը իր երախտագիտությունն է հայտնել «Դիակոնիա» բարեգործական հիմնադրամի կողմից իրականացված ծրագրի համար և նշել է, որ արդարացի բաշխում իրականացնելու համար անհրաժեշտ է նաև բավարարել ծրագրից դուրս մնացած մյուս բազմազավակ ընտանիքներին:
«Շատ շնորհակալ ենք, որ «Դիակոնիա» բարեգործական հիմնադրամի կողմից նման ջերմ վերաբերմունքի են արժանացել մեր բազմազավակ ընտանիքները, սակայն պետք է ոչ ոք ուշադրությունից դուրս չմնա և հանձնարարում եմ կառավարության միջոցներով նույնատիպ նվերներով բավարարել նաև մայրաքաղաքի և Շահումյանի շրջանի բազմազավակ ընտանիքներին»,- ասել է վարչապետը:
Կարդացեք նաև
Խորհրդակցության ընթացքում Գործադիր իշխանության ղեկավարը շրջանային վարչակազմերի ղեկավարների հետ քննարկել է նաև աշնանացանի հետ կապված մի շարք հարցեր, անդրադարձ է եղել գյուղատնտեսության զարգացման հայեցակարգի մշակմանը և այդ շրջանակում կազմակերպվող մասնագիտական դասընթացներին:
ԱՀ կառավարության աշխատակազմի տեղեկատվության և հասարակայնության հետ կապերի բաժին
