«2010թ.-ից, երբ թվային հեռարձակման անցնելու հայեցակարգ մշակվեց, մինչ օրս անորոշության մեջ ենք: Սկզբում լիցենզիաները մեկ տարով երկարաձգեցին, հետո եւս մեկ տարով, իսկ հիմա՝ մինչեւ 2020թ-ը, մինչեւ մասնավոր մուլտիպլեքսոր ի հայտ կգա»,-Aravot.am-ի հետ զրույցում խոսելով հեռարձակման թվայնացման համատեքստում մարզային հեռուստաընկերությունների խնդիրների մասին, ասաց Արմավիրի «Ալտ» հեռուստաընկերության տնօրեն Խաչիկ Դանիելյանը:
«Չգիտենք՝ մասնագետներով համալրվե՞նք, ներդրումներ անե՞նք, ծրագրեր մշակե՞նք…Մինչեւ հանրապետության ողջ տարածքով թվային հեռարձակման անցնելը՝ մի կերպ գոյատեւում ենք, բայց երբ անալոգային հեռարձակումն իսպառ վերացվի…իսկ մենք անալոգային ենք հեռարձակում՝ սպառող չունենալով: Մարդիկ կցորդիչները ձեռք են բերել եւ էլ ջանք չեն գործադրի, որ անալոգային հեռարձակում ունենան»,-դժգոհեց նա:
Ըստ Խաչիկ Դանիելյանի՝ մինչ օրս ոչ մի մասնավոր մուլտիպլեքսոր մրցույթին մասնակցելու հայտ չի ներկայացրել, քանի որ պայմանները շատ խիստ են. «Այս փոքր շուկայում մեծ ներդրումներ պետք է արվեն, ըստ հաշվարկների՝ 100 միլիոն դոլարից ավելի: Կարելի է ասել՝ բիզնեսի օրենքներին հակառակ է, քանի որ ոչ մեկ այդ չափի ներդրում չի անի»:
«Ալտ»-ի տնօրենը հետեւյալ առաջարկն ունի՝ թվային հեռարձակման չանցած մարզային հեռուստաընկերություններին հնարավորություն տալ միավորվելու եւ թվային հեռարձակման սեփական սարքավորումները ձեռք բերելու:
Կարդացեք նաև
Լուիզա ՍՈՒՔԻԱՍՅԱՆ
