«Նախաձեռնել էինք հանդիպում կուսակցությունների ներկայացուցիչների հետ, մենք ինքներս ունենք ցանկություն ստեղծելու մի ձեւաչափ, որպեսզի խորհրդարանական եւ, ինչու չէ, արտախորհրդարանական ուժերի ներկայացուցիչներին հրավիրենք, լսենք նրանց առաջարկները: Դա աշխատանքի կարեւոր ձեւաչափ է»,-ԵՊՀ-ում այսօր «Հայաստանի Հանրապետության երիտասարդ ընտրող» կրթական ծրագրի միջոցառման ժամանակ լրագրողների հետ զրույցում անդրադառնալով հարցին, թե արդյոք ԿԸՀ-ն Ընտրական օրենսգրքի շուրջ շարունակո՞ւմ է գործակցել ընդդիմության հետ, ասաց ՀՀ Կենտրոնական ընտրական հանձնաժողովի նախագահ Տիգրան Մուկուչյանը:
Նա տեղեկացրեց, որ ընդդիմադիրները ԿԸՀ-ի նշյալ առաջարկին դրական են արձագանքել: Խոսելով խնդրի մասին, որ ընդդիմադիրները դժգոհություն ունեն ռեյտինգային քվեարկության առնչությամբ, Տիգրան Մուկուչյանն ասաց. «Մեր գործառույթը չէ ԸՕ դրույթների վերաբերյալ տեսակետների ներկայացումը: Կա ԸՕ, որի դրույթները պետք է անվերապահորեն կյանքի կոչվեն»:
Թե «Կուսակցությունների մասին» օրենքի նախագիծն ի՞նչ ազդեցություն կունենա առաջիկա խորհրդարանական ընտրությունների վրա, ԿԸՀ նախագահը դժվարացավ կարծիք հայտնել. «ԸՕ-ում հստակ ամրագրված է, թե ինչ կարգով են կուսակցությունները կամ դաշինքները մասնակցելու ընտրություններին»:
«ԱԺ ընտրությունների ժամանակ գործընթացը չի՞ բարդանա, եթե կուսակցությունները շատ լինեն» հարցին` ԿԸՀ նախագահն այսպես արձագանքեց.«Իհարկե, կազմակերպական առումով աշխատանքի ծավալը մեծ կլինի, բայց դա չի նշանակում, որ եթե կուսակցությունների թիվը ենթադրյալից ավելի լինի, խնդիր կառաջանա: Դա բերելու է լրացուցիչ աշխատանքի»:
Կարդացեք նաև
Տիգրան Մուկուչյանը անձնական կարծիք չհայտնեց՝ կուսակցությունների շատ լինելը լա՞վ է, թե վատ. «Մենք տվյալ օրենքի հետ առնչություն չունենք»,-եզրափակեց նա:
Լուիզա ՍՈՒՔԻԱՍՅԱՆ
