Մամուլում հրապարակումներ կան, որ իրականում ՀՀԿ-ին անդամակցելու դիմում ներկայացնողների 7000 թիվը չի լրացել, 2500-ը «Գազպրոմ Արմենիայի» աշխատակիցներն են եւ հիմա ստիպում են, որ ՀԷՑ-ի աշխատողներն էլ դիմում գրեն, որ այդ 7000-ը լրացվի:
Այսօր այս առնչությամբ «Պոստ Սկրիպտում» ակումբում լրագրողների հարցին ՀՀԿ խմբակցության քարտուղար Գագիկ Մելիքյանը պատասխանեց. «Իրականում դա այն հարցը չէ, որ հնչեղություն տան, հատկապես` ՀՀԿ-ի պարագայում: Այո, ՀՀԿ-ին անդամակցեցին վարչապետը, մի քանի նախարարներ եւ այդ ընթացքում ՀՀԿ-ին անդամագրվեցին նաեւ հանրապետության բազմաթիվ քաղաքացիներ: ՀՀԿ-ի համար անդամագրման եւ զտման գործընթացը սովորական առօրյա աշխատանք է, ուղղակի այդ ընթացքում, միգուցե կապված վարչապետի անդամագրման հետ, թիվը մեծացավ: Ասել, որ 7000 հոգու անդամագրումը ՀՀԿ-ի համար ինչ-որ մի արտառոց դեպք է` այդպես չէ»:
Նա ասաց, որ ԶԼՄ-ները դրանից փորձեցին սենսացիա անել. «Իրականում ՀՀԿ-ից, նաեւ զտման հետեւանքով յուրաքանչյուր օր բավականին քանակությամբ անդամներ ազատվում են, հեռացվում են ՀՀԿ-ից` տարբեր պատճառներով: Դա որեւէ նշանակություն չունի եւ որեւէ մեկը դրան պարզապես լուրջ տեղ չի էլ տալիս, որովհետեւ դա բնական գործընթաց է, որն իրականացնում է ՀՀԿ-ն»:
Նա ասաց, որ Հայաստանի ամենաազդեցիկ ուժին, իհարկե, նման քանակով մարդկանց անդամագրումը լավ է, նշանակում է վստահության բարձրացում, հավատի վերականգնում, ակնկալիքներ ունենալ այդ կուսակցությունից: Ըստ նրա, մարդիկ իրենց հույսը կապում են ՀՀԿ-ի նման ազդեցիկ ուժի հետ. «Այդ 7000-ը վերջը չէ, ամեն օր էլ անդամագրում կա»:
Կարդացեք նաև
Իսկ թե ինչու են ՀՀԿ-ից անդամներ հեռացվում` Գագիկ Մելիքյանը պատասխանեց. «Կուսակցության հետ կապի ընդհատման, այլ վայրեր տեղափոխվելու: Ամեն ինչ հնարավոր է»:
Հռիփսիմե ՋԵԲԵՋՅԱՆ
