Այսօր կառավարության նիստում վարչապետ Կարեն Կարապետյանը հայտարարեց՝ կառավարությունը շարունակում է ԾԻԳ-երի կրճատումն ու սկսում է 2-րդ փուլը:
Վարչապետի խոսքերով՝ ԾԻԳ-երի օպտիմալացման ուղղությամբ կատարված աշխատանքների արդյունքում մինչ օրս կառավարության որոշումներով լուծարվել են 5 ԾԻԳ-եր: Այժմ, ըստ վարչապետի, օտարերկրյա եւ միջազգային վարկային կազմակերպություններից ստացված վարկային միջոցներով ծրագրերն իրականացնում են 17 նմանատիպ կառույցներ. «Այնտեղ, եթե հիշողությունս ինձ չի դավաճանում, 11 հատ ԾԻԳ է, մի քանի խմբեր են, բաժիններ, ՓԲԸ-ներ եւ այլն: Առաջարկում ենք մեկնարկել ԾԻԳ-երի օպտիմալացման հաջորդ փուլը»:
Կարեն Կարապետյանը ԾԻԳ-երի քանակի եւ դրանց պահպանման ծախսերի կրճատման ուղղությամբ փոխվարչապետ Վաչե Գաբրիելյանին հանձնարարեց ներգրավելով ճյուղային պետական մարմինների պատասխանատուներին, բանակցել օտարերկրյա եւ միջազգային վարկատու կազմակերպությունների հետ:
Վարչապետն առաջարկեց քննարկել ու կիսով չափ նվազեցնել ԾԻԳ-երի քանակը, իսկ իսկ դրանց պահպանման ծախսերը՝ մեկ երրորդով. «Մենք նախնական հաշվարկել ենք՝ 11 ԾԻԳ-ից պետք է մնան հինգը: Բոլոր կողքի կառույցները, ստորաբաժանումները, բաժինները պետք է վերանան: ՓԲԸ-ներում այդ գործառույթն իրականացնող կառույցները նույնպես պետք է օպտիմալացվեն: Առաջարկում եմ երկու շաբաթվա ընթացքում ներկայացնել աշխատանքների իրականացման ժամանակացույցը»:
Կարդացեք նաև
Նելլի ԲԱԲԱՅԱՆ
