Րոպեներ առաջ Վերաքննիչ քրեական դատարանում ավարտվեց «Սասնա ծռեր» խմբավորման անդամ Արայիկ Խանդոյանի վերաբերյալ վերաքննիչ բողոքների քննությունը։ Ինչպես Aravot.am-ի հետ զրույցում ասաց Արայիկ Խանդոյանի պաշտպան Արայիկ Պապիկյանը, դատարանը մերժեց Արայիկ Խանդոյանի պաշտպանների բողոքը` նրա կալանքը թողնելով ուժի մեջ:
Նախքան բողոքների քննությունը, պաշտպանի խոսքերով, Արայիկ Խանդոյանը դատավոր Ս. Չիչոյանին բացարկ հայտնեց` ասելով, որ «չի վստահում մի դատավորի, որը ծառայում է ռեժիմին, որի դեմ ինքը պայքարի է ելել, հետեւաբար վստահ չէ, որ այդ դատավորը կլինի արդարամիտ»:
Ըստ Արայիկ Պապիկյանի, դատարանը Արայիկ Խանդոյանի այդ միջնորդությունն էլ է մերժել, սակայն, քանի որ որոշումը դեռ չեն ստացել, չգիտեն` ինչ հիմնավորմամբ:
Պաշտպանը նաեւ հայտնեց, որ Արայիկ Խանդոյանը դատարանում վրդովվել է, երբ դատավորը նրան մեղադրյալով է դիմել. «Ասաց, որ ինքը մեղադրյալ չէ, քաղբանտարկյալ է»:
Կարդացեք նաև
Վերաքննիչ բողոքի մերժման որոշումն առայժմ Արայիկ Պապիկյանը չի ստացել, երբ ստանա` կդիմեն Վճռաբեկ դատարան:
Լուսինե ԲՈՒԴԱՂՅԱՆ
