ԲԱՑ ՆԱՄԱԿ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ ԿԱՐԵՆ ԿԱՐԱՊԵՏՅԱՆԻՆ
Մեծարգո’ պարոն վարչապետ, Ձեզ է դիմում ՀՀ Շիրակի մարզ Գյումրու N38 հիմնական դպրոցի հանրույթը, քանի որ մեզ անհանգստացնող հարցը անհապաղ լուծման կարիք ունի:
Ձեր պաշտոնավարման առաջին օրերից հետևում ենք բարեփոխումների այն գործընթացին, որտեղ Դուք կարևորում եք որակյալ մասնագետի, ղեկավարի, կառավարչի դերը:
ՀՀ Շիրակի մարզի Գյումրու N 38 հիմնական դպրոցը 2002 թվականից ղեկավարում է տիկին Գոհար Շահբազյանը, ով խստապահանջ, բանիմաց, հետևողական տնօրեն է, լավ ընկեր ու բարեկամ:
Կարդացեք նաև
2016 թվականի նոյեմբերի 26-ին լրացավ տիկին Շահբազյանի պաշտոնավարման ժամկետը, և հաստատության աշխատակիցները համոզված էին, որ դպրոցում ժամանակավոր պաշտոնակատար է նշանակվելու տիկին Գոհարիկ Շահբազյանը, քանի որ Գյումրու բոլոր դպրոցներում ժամանակավոր պաշտոնակատար նշանակվել են նույն դպրոցի նախկին տնօրենները:
Շիրակի մարզպետ Հովսեփ Սիմոնյանի 28.11.2016 թվականի 476-Ա որոշմամբ՝ Գյումրու N38 հիմնական դպրոցում ժամանակավոր պաշտոնակատար նշանակվեց N42 դպրոցի փոխտնօրեն, անվճար արձակուրդում գտնվող Արփինե Նիկողոսյանը (հետաքրքիր հանգամանք. անվճար արձակուրդ տրամադրել ժամանակավոր պաշտոնավարման համար):
Շիրակի մարզպետը մի քանի անգամ չի ընդունել տնօրեն Գոհարիկ Շահբազյանին, իսկ մարզպետարանում աշխատակիցները չեն կարողացել հիմնավորել Գ. Շահբազյանի ժամանակավոր պաշտոնակատար նշանակելու մասին տրված դիմումը անպատասխան թողնելու փաստը:
Նոյեմբերի 28-ին Հովսեփ Սիմոնյանը մեծ դժվարությամբ ընդունեց N38 հիմնական դպրոցի մանկավարժական հանրույթին (նույն օրը, երկրորդ անգամ մարզպետարան գնալուց հետո): Լսել հանրույթի 7 մանկավարժներին և հանրույթին
անհանգստացնող հարցին, թե ինչո՞ւ ժամանակավոր պաշտոնակատար չի նշանակվել նախկին տնօրենը, պատասխանեց, որ օրենսդրություն չի խախտել, ունի իրավասություն, պարտավոր չէ բացատրություն տալու, և վերջապես, այդպես է ուզում: Պարզ ու հասկանալի են իրավական ու օրենսդրական կողմերը, բայց կա նաև հարցի բարոյական կողմը. ո՞րն է մարզպետի կայացրած որոշման տրամաբանությունը, եթե դպրոցը գտնվում է կիսամյակային ամփոփման փուլում:
Պաշտոնակատար նշանակված տնօրենի ո՞ր առանձնահատուկ տարբերության համար է կայացվել այս որոշումը: Եվ վերջապես, այս գործողություններում ակնհայտ նկատվում է պետական պաշտոնյայի արհամարհանքը կրթության մշակների նկատմամբ, որը կասկածի տակ է դնում վաղվա կրթված, արժանապատիվ հայ քաղաքացի ունենալու օրհասական պահանջը:
Ակնկալում ենք Ձեր սկզբունքային, պրոֆեսիոնալ միջամտությունը այս հարցի կապակցությամբ: 30.11.2016թ
N 38 հիմնական դպրոցի աշխատակիցներ.
Պահանջն օրինական է: Այսպես է միշտ ստացվում, երբ որոշումներն ընդունվում են ոչ ուղեղի տրամաբանությամբ, այլ մարմնի այլ հատվածի թելադրանքով: Մարդկանց հետ աշխատելն ու ղեկավարելը լուրջ շնորհք է և ամեն մարդու բան չէ: