Ադրբեջանում համացանցում երկրի նախագահի դեմ հնչեցրած վիրավորանքների համար սպասվում է քրեական պատասխանատվություն: Նման որոշում է ընդունել երկրի խորհրդարանը՝ գլխավոր դատախազ Զաքիր Գարալովի առաջարկով, հաղորդում է vesti.az-ը:
Նախկինում Ադրբեջանի օրենսդրությունը պատիժ նախատեսում էր ԶԼՄ-ներում նախագահին վիրավորելու համար: Այժմ հոդվածում ավելացել է նաև «տեղեկատվական ինտերնետ-ռեսուրսներում» եզրը: Օրինախախտներին սպասվում է 500-1000 մանաթ (շուրջ 280-570 դոլար) տուգանք կամ երկու տարի ուղղիչ աշխատանք կամ 2 տարվա ազատազրկում:
Առավել խիստ պատիժ է սպասվում նրանց, ովքեր նախագահի հասցեին համացանցում վիրավորանքներ կհնչեցնեն կեղծ օգտահաշիվներից: Նրանց սպասվում է 1000-1500 մանաթ (շուրջ 570-850 դոլար) տուգանք կամ մինչև 3 տարվա ազատազրկում:
Ավելի վաղ հաղորդվում էր, որ Ադրբեջանում շուրջ 20 ժամ արգելափակված են եղել «Ամերիկայի ձայն» և «Ազատություն» ռադիոկայանները, ինչպես նաև ընդդիմադիր «Ազադլիգ» թերթը և «Մայդան TV» ռեսուրսը: Ավելի ուշ դրանց հասանելիությունը վերականգնվել է: Երկրի կապի նախարարությունից պատասխան չեն տվել այն հարցին՝ թե ինչու են արգելափակվել ընդդիմադիր ռեսուրսները:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
