Նոյեմբերի 29-ին Կրասնոդարի հայոց թեմի առաջնորդարանի «Վարդանյան» կենտրոնում ՀՀ սփյուռքի նախարարության, Հայաստանյայց Առաքելական Սուրբ Եկեղեցու Հարավային Ռուսաստանի հայոց թեմի, Ռուսաստանի հայերի միության Կրասնոդարի երկրամասի տարածաշրջանային բաժանմունքի նախաձեռնությամբ և աջակցությամբ իրականացվող «Մայրենի լեզվի ուսուցման խնդիրները Ռուսաստանի Դաշնության հայ համայնքներում» տարածաշրջանային համաժողովն ամփոփեց իր աշխատանքները:
Համաժողովի միջոցառումների շրջանակում տեղի ունեցավ ՀՀ և ԼՂՀ անկախության 25-ամյակին նվիրված «Հայաստան՝ հավերժական իմ սեր» ցուցահանդեսի բացումը, որից հետո համաժողովը սկսեց իր աշխատանքները:
ՀՀ սփյուռքի նախարարության համահայկական ծրագրերի վարչության պետ Գագիկ Գյանջումյանը ներկայացրեց «ՀՀ սփյուռքի նախարարության հայապահպանությանը միտված, կրթական ծրագրերը Հայաստան-Սփյուռք գործակցության շրջանակներում» զեկույցը:
Կարդացեք նաև
ԵՊՄՀ մանկավարժական գիտությունների դոկտոր, պրոֆեսոր Ջուլիետտա Գյուլամիրյանը ելույթ ունեցավ «Ոչ հայկական միջավայրում ապրող հայ երեխաների մեկօրյա ուսումնական գործընթացի կազմակերպման սկզբունքները» թեմայով: Պետական լրացուցիչ կրթության «Ցենտրալնի» կենտրոնի մանկավարժ Մեքսիդա Մադոյանն անդրադարձավ Հայեցի դաստիարակության գործում գեղարվեստական միջոցառումների դերին:
«Նռան հատիկներ» հայոց լեզվի ընտանեկան ակումբի մանկավարժ Գայանե Աղայանը խոսեց նախադպրոցական տարիքի երեխաներին հայոց լեզու ուսուցանելու գործընթացում զարգացնող խաղերի կարևորության մասին:
Ռուսախոս միջավայրում հայեցի կրթության և դաստիարակության վերաբերյալ իր փորձը ներկայացրեց Նովոռոսիսկի հայկական կիրակնօրյա դպրոցի հայոց լեզվի ուսուցչուհի Արևիկ Բալայանը: Մոսկվայի մարզի Լաբինսկ քաղաքի կրթամշակութային կենտրոնի հայոց լեզվի ուսուցչուհի Մարինա Հովհաննիսյանը անդրադարձավ ռուսախոս միջավայրում մայրենիի դասավանդման առանձնահատկություններին: Պետական լրացուցիչ կրթության «Պրիկուբանսկի» կենտրոնի մանկավարժ Արշալույս Երեմյանը ներկայացրեց հայոց լեզվի դասերին ինտերակտիվ մեթոդների օգտագործման անհրաժեշտությունը և հնարավորությունները:
Պյատիգորսկի Հայ մշակույթի կենտրոնի ուսուցչուհի Գոհար Թունյանը ներկայացրեց հայ ժողովրդի պատմության դասավանդման խնդիրները Սփյուռքում:
ՀՀ սփյուռքի նախարարի խորհրդական Ստեփան Պետրոսյանը ամփոփեց համաժողովի աշխատանքները:
Այնուհետև ուսումնական ձեռնարկների հեղինակներ Երազիկ Հարությունյանը, Կարինե Կատանյանը և Կարինե Սարգսյանը համաժողովի մասնակից ուսուցիչների համար անցկացրին վարպետության դասեր:
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՍՓՅՈՒՌՔԻ ՆԱԽԱՐԱՐՈՒԹՅՈՒՆ
