Այսօր ՀԱԿ խմբակցության պատգամավոր Հրանտ Բագրատյանը ԱԺ Կանոնակարգ օրենքի նախագծի քննարկման ժամանակ իր դժգոհությունը հայտնեց:
Հրանտ Բագրատյանն ապշել էր նախագծում ամրագրված 61-րդ հոդվածից, ըստ որի, խմբակցության ղեկավարը կարող է պատգամավորի լիազորագրի հիման վրա նրա փոխարեն քվեարկել: Բագրատյանը հարցրեց՝ ինչի՞ եք սրան գնացել. «Պատգամավորի տեղը ո՞վ իրավունք ունի քվեարկի: Սահմանադրությամբ պատգամավորի ինստիտուտը ինքն է հենց: Ես չգիտեմ նման գաղափար ինչու է առաջացել: Տպավորություն ունեմ, որ դա գալիս է նրանից,որ մեծամասնությունն ուզում է իր համար երաշխիքներ ստեղծի»:
Նա ասաց, որ պատգամավորին ոչ ոք իրավունք չունի նաեւ խմբակցությունից հանել: Պատգամավորն ունի կարծիք եւ պետք է հարգել այդ կարծիքը:
Հարակից զեկուցող Վահրամ Մկրտչյանը (լուսանկարում) պատասխանեց, որ սա նախատեսել են այն դեպքերի համար, երբ պատգամավորն ունի դիրքորոշում, շատ է կարեւորում այն, բայց գործուղման է, ուստի կարող է լիազորել խմբակցության ղեկավարին, որ իր փոխարեն քվեարկի: Ըստ Վահրամ Մկրտչյանի, բա եթե խմբակցության ղեկավարին չլիազորի, էլ ո՞ւմ լիազորի:
Կարդացեք նաև
Հրանտ Բագրատյանը բացատրեց, որ ուրիշի «տեղը քվեարկելը» անընդունելի է. «Սրանից ես ուրիշ բանի հոտ եմ առնում»:
Վահրամ Մկրտչյանն էլ ասաց, որ հիմա պատգամավորներ կան, որ փակ ծրարով իրենց որոշումը տալիս են քարտուղարություն, հիմա իրենք դրա իրավունքը տալիս են խմբակցության ղեկավարին:
Էդուարդ Շարմազանովն էլ հստակեցրեց, որ դա միայն այն դեպքերի համար է, երբ պատգամավորը պաշտոնական գործուղման մեջ է, մնացածը դա անհարգելի է:
Հռիփսիմե ՋԵԲԵՋՅԱՆ
