ԱԺ Կանոնակարգ օրենքի նախագծի քննարկումը խորհրդարանում շարունակվում է: ՀԱԿ խմբակցության պատգամավոր Հրանտ Բագրատյանը հարակից զեկուցող Վահրամ Մկրտչյանին դժգոհեց, որ պատգամավորին ելույթի համար 5 րոպե են նախատեսում: Նա ասաց, որ ԱԺ-ի հիմնական ինստիտուտը պատգամավորն է, ոչ թե ԱԺ-ի ապարատը, ԱԺ նախագահը, տեղակալները: Այդ առումով պատգամավորը պետք է ունենա ավելի շատ իրավունք խոսելու, արտահայտվելու, քան վարչապետը. «Ես չեմ հասկանում՝ 5 րոպեն ո՞րն է: Բա պատգամավորին ընտրել են, առավել եւս, եթե մարդը ընդդիմություն է առաջադրում, պիտի կարողանա՞ արտահայտվի: Ինչի՞ եք սեղմում: Սեղմում եք՝ էներգիան ուրիշ տեղ դուրս կգա»:
Հրանտ Բագրատյանի այս արտահայտությունից ԱԺ նիստերի դահլիճում աշխուժություն եղավ: Հետո Բագրատյանը ծիծաղելով ճշտեց. «Ես ձեր հասկացածը նկատի չունեի»:
Վահրամ Մկրտչյանը պատասխանեց, որ 5 րոպե են գրել նախագծում, որովհետեւ հաճախ պատգամավորները նույն միտքը մի քանի անգամ կրկնում են: Տիգրան Ուրիխանյանն առաջարկեց 7 րոպե դարձնել, օրենքի հեղինակները չմերժեցին:
Հրանտ Բագրատյանն ասաց, որ պատգամավորին «նեղում են». «Դուք բռնել եք՝ ամենաստից հարցերին կառավարությանը տալիս եք 30 րոպե, մի ժամ: Պատգամավորի խնդիրը խոսելն է, ի՞նչ 7 րոպե, 10-ն էլ է քիչ»:
Կարդացեք նաև
Հռիփսիմե ՋԵԲԵՋՅԱՆ
