Գագիկ Մակարյանը մտահոգություն ունի, որ ընտրությունները կվնասեն ՀՀ-ում տնտեսական աճին: «Նոյյան տապան» մամուլի սրահում լրագրողների հետ հանդիպմանը ՀՀ Գործատուների հանրապետական միության նախագահ Գագիկ Մակարյանը ՀՀ կառավարության ծրագիրն արդյունավետ է համարում ու միևնույն ժամանակ նշում, որ նման արդյունավետության պայմաններում 2.5 միլիարդ բյուջեով հնարավոր է հասնել 3.2 տոկոս տնտեսական աճի, եթե ընտրությունները չխանգարեն:
Ռուսաստանի գործոնը ևս էական է. «Եթե հանվեն Ռուսաստանի դեմ պատժամիջոցները, եկող տարի ՌԴ-ն «պլյուսով» ՀՆԱ աճ կունենա, դա էլ մեզ կփրկի, քանի որ մեր տնտեսությունն այսօր ՌԴ-ից շատ կախված է»:
Անդրադառնալով ՀՀ վարչապետ Կարեն Կարապետյանի՝ ՀՀԿ-ին անդամակցելու որոշման վերաբերյալ հնչեցված փաստարկներին՝ պարոն Մակարյանն ասաց. «Հուսով էի, որ այդ փաստարկների մեջ ՀՀ վարչապետը կներկայացներ կոռուպցիայի դեմ պայքարի միացյալ ուժերով գործընթացի սկիզբը: Հույս ունեի նաև, որ ՀՀԿ համագումարում կխոսվեր այդ մասին, լավ վայր էր, քանի որ հիմնական պաշտոնյաներն այդտեղ էին գտնվում, սակայն դա չարվեց»:
Պարոն Մակարյանը, անդրադառնալով ՀՀ տնտեսական քաղաքականության մշակմանը, մի շարք խնդիրներ բարձրացրեց. «Տպավորությունն այն է, որ մեզ մոտ կանխատեսումների մեխանիզմը չի աշխատում: Դժվար չէ կանխատեսել, թե տնտեսության որ ճյուղն ինչ հեռանկարներ ունի: Իսկ երբ դրա մասին չեն ասում ու չեն հաշվարկում, առաջանում է հարց՝ արդյոք պետական պաշտոնյաները պրոֆեսիոնա՞լ են իրենց թիմով»: Պարոն Մակարյանն օրինակ բերեց ՀՀ տնտեսական զարգացման և ներդրումների նախարարությանը, ու մտահոգություն հայտնեց, որ նախարարության վեց վարչությունները՝ արդյունաբերության, առևտրի, փոքր ու միջին բիզնեսի հետ կապված վարչությունները, իրականում պետք է լինեն քաղաքականություն տանողներ, բայց այդ գործառույթը չեն կատարում:
Կարդացեք նաև
Գագիկ Մակարյանին մտահոգում է նաև սննդի անվտանգությունը. «Սննդի անվտանգության տեսչությունը պասիվ վիճակում էր գտնվում, հիմա ակտիվացել է կառավարության հորդորով: Վարչապետի հետ հանդիպման ժամանակ այդ խնդիրը բարձրացրել եմ»:
Անդրադառնալով տեսուչների աշխատանքին՝ Գագիկ Մակարյանը նշեց, թե հաճախ տեսուչներն են ձեռնարկություններին հանգստացնում, թույլ տալիս մնալ այդ վիճակում, որ կոռուպցիոն ռիսկերը միշտ բարձր մնան:
Եթե մսի շուկայում փոփոխություններ տեղի են ունեցել, օրինակ՝ այսուհետ մորթված մսի վրա պետք է լինի տեղեկություն, թե այդ կենդանին որտեղ է մորթվել, ապա կաթնամթերքի շուկայում առաջընթաց չկա. «Կաթնամթերքի շուկան նույն հիվանդությամբ է տառապում, եղածներին գումարվել են նաև այլ խնդիրներ: Եթե այլ արտադրությունների դեպքում կա արտահանման դիվերսիֆիկացիա, ապա այս ոլորտում դա չկա: Նրանք սահմանափակված են ներքին շուկայում: Չնչին քանակի պանիր են արտահանում, դա իրենց եկամուտների մեջ էական դերակատարություն չի ունենում: Սակայն, ցավոք, առաջարկներ չեն ներկայացվում կաթի հումքի աճի, մյուս խնդիրների լուծման համար»:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
