ՀՀԿ պատգամավորների եւ Արմեն Ռուստամյանի հեղինակած «ԱԺ կանոնակարգ օրենքի» նոր նախագծի քննարկումն է ԱԺ-ում: Այն ներկայացրեց ԱԺ պետաիրավական հարցերի հանձնաժողովի նախագահ Հովհաննես Սահակյանը:
Նա ասաց, որ պատգամավորներին առավել հետաքրքրում է նստաշրջանների եւ նիստերի տեւողությունը: Նա ասաց, որ քառօրյա նիստեր են էլի լինելու, բայց երկուշաբթի լինելու է Խորհրդի նիստերի օրը, որից հետո երեքշաբթի առավոտյան ժամը 10.00-ից են սկսելու նիստերը, մինչեւ երեկոյան 18.00: Նիստերը կարող են շարունակվել մինչեւ օրակարգի սպառումը, բայց դա չի կարող տեւել ավելի քան 3 օր: Հովհաննես Սահակյանն ասաց, որ այս ճկուն համակարգն են ներդրել, որ օրակարգում կուտակումներ չունենան:
Խորհրդի եւ ԱԺ-ի որոշմամբ՝ նիստերը կարող են շարունակվել ընդհուպ մինչեւ 24.00-ն:
Այն նախագծերը, որոնք հանձնաժողովում բացասական եզրակացություն են ստացել, բայց որոշ դրույթներ դրական եզրակացություն են ստացել, կարող է պատգամավորն առանձին այդ դրույթները ամփոփել եւ ներկայացնել ԱԺ-ի քննարկմանը:
Կարդացեք նաև
Հովհաննես Սահակյանն ասաց, որ Քննիչ հանձնաժողով կարող է ձեւավորվել ¼-ի պահանջով: Հանրությանը հետաքրքրող հարցերը, որոնք ԱԺ իրավասության ներքո են, կարող է քննիչ հանձնաժողովի քննարկման առարկան դառնալ: Այդ հանձնաժողովը կարող է պահանջել տեղեկատվություն, համապատասխան պաշտոնատար անձանց հրավիրել քննարկման, որի արդյունքում լինում է զեկույց:
Հռիփսիմե ՋԵԲԵՋՅԱՆ
