«Եթե մենք խոսում ենք ժողովրդավարությունից, պետք է գիտակցենք, որ ժողովրդավարությունը նախեւառաջ ազատ, բաց մրցակցություն է, չպետք է մենք արհեստականորեն խոչընդոտենք որեւէ քաղաքական ուժի մասնակցությանը»,- այսօր ԱԺ-ում «Կուսակցությունների մասին» օրենքի քննարկման ժամանակ ասաց ԱԺ փոխխոսնակ Էդուարդ Շարմազանովը: Նա ասաց, որ պետք է կարողանան հնարավորինս գնալ ազատականացման ճանապարհով: Բայց դա չի նշանակում, որ մեկ-երկու հոգով կարող են կուսակցություն ստեղծել, դրա համար կա ՀԿ, ուստի որոշ սահմանափակումներ պետք են. «Մենք պետք է կարողանանք ՀԿ-ն կամ «Գարեջրի սիրահարների միությունը» տարբերակել քաղաքական կուսակցությունից»:
Նա ասաց, որ աստիճանաբար պետք է գնան նրան, որ այն կուսակցությունները, որոնք մի քանի գումարման ԱԺ-ում չեն լինում, ինքնալուծարվեն. «Եթե կուսակցությունը 15 տարի շարունակ չի մասնակցում խորհրդարանական ընտրություններին, ՏԻՄ ընտրություններին, լավ, ժողովուրդ ջան, իմաստը ո՞րն է այդ կուսակցության, ո՞րն է դրա իմաստը»:
Էդուարդ Շարմազանովը առաջարկում է գնալ ոչ թե ռադիկալ, այլ՝ զգուշավոր բարեփոխումների ճանապարհով:
Նա մաղթեց, որ ինչպես մեկ գիշերում 7000 հոգի ՀՀԿ-ական դարձան, ընդդիմադիրների կուսակցություններն էլ մեկ գիշերում համալրվեն 20 հազար անդամով:
Կարդացեք նաև
Էդմոն Մարուքյանն արձագանքեց. «Լավ մաղթանք է, բայց եկեք իրականությունից խոսենք»: Նա ընդգծեց, որ իշխանությունը միահեծան մոնոպոլ համակարգ է ստեղծում, այդ համակարգում որտեղի՞ց 20 հազար մարդ, որ մտնի ընդդիմության շարքերը:
Հռիփսիմե ՋԵԲԵՋՅԱՆ
