«ՀՀԿ մտնելու դիմումով վարչապետը հաստատեց, որ ինքը ժամանակավոր մարդ չէ քաղաքական կյանքում, որ ինքը հրավիրյալ չէ մեր քաղաքական իրականության մեջ եւ կառավարությունում գործադիր տնօրեն չէ, այլ պատրաստ է լինել քաղաքական կերպար»,-«Մեդիա Կենտրոնում» այսօր լրագրողների հետ հանդիպմանն ասաց ՀՀԿ փոխնախագահ Արմեն Աշոտյանը:
Նրա խոսքով՝ «ինտրիգ» կլիներ այն ժամանակ, երբ Կարեն Կարապետյանը չանդամակցեր ՀՀԿ-ին:
ՀՀԿ փոխնախագահը հիշեցրեց համագումարում հնչած հայտարարությունը, որ առաջիկա խորհրդարանական ընտրություններում հաղթելու դեպքում ՀՀԿ-ի վարչապետի թեկնածուն լինելու է Կարեն Կարապետյանը. «Մենք ազնիվ ասացինք դա՝ ընտրություններից վեց ամիս առաջ: Սրանով եւս մեկ անգամ հաստատում ենք, որ ոչ թե իրավիճակային լուծումներ ենք տալիս, այլ ռազմավարական ծրագիր: Ուրախ կլինեմ, որ մյուս քաղաքական ուժերն էլ ասեն՝ ո՞վ է իրենց թեկնածուն»:
Հարցին՝ «2018թ. հետո՞ էլ է Կարեն Կարապետյանը լինելու վարչապետ», Արմեն Աշոտյանն այսպես արձագանքեց. «Քաղաքականությունը կանխատեսելի է որոշակի շրջանակներում: Խորհրդարանական ընտրությունների քվեն է ծնելու եւ ձեւավորելու ՀՀ-ում իշխանությունը»:
Կարդացեք նաև
Արմեն Աշոտյանն անդրադարձավ նաեւ հարցին, թե երբ են քաղաքացիները զգալու Սերժ Սարգսյանի եւ Կարեն Կարապետյանի գործակցության արդյունքները: Նա նախ վստահություն հայտնեց, որ Կառավարության ծրագիրը շատ հստակ է. «Որպեսզի քաղաքացին ինքն իրեն խոստովանի, որ զգում է փոփոխություն, պետք է ժամանակ»:
Լուիզա ՍՈՒՔԻԱՍՅԱՆ
