«Վստահության քվեն բացառված է, այդպիսի քվե չի կարող լինել: Կարեն Կարապետյանը կլինի, թե մեկ ուրիշը, շարքային քաղաքացու համար ոչինչ չի փոխվելու»,-Aravot.am-ի հետ զրույցում անդրադառնալով ՀՀԿ համագումարում հնչած հայտարարությանը, թե առաջիկա խորհրդարանական ընտրություններում վստահության քվե ստանալու դեպքում ՀՀԿ-ի վարչապետի թեկնածուն լինելու է Կարեն Կարապետյանը, ասաց «Ժառանգություն» կուսակցության փոխնախագահ Արմեն Մարտիրոսյանը:
Նրա բնորոշմամբ՝ ՀՀԿ-ն փորձում է «դեմքի մաքրման» աշխատանքներ իրականացնել եւ ավելի ներկայանալի լինել առաջիկա խորհրդարանական ընտրություններում. «Բայց որեւէ մեկն այդ հարցում պատրանքներ չունի, ի՞նչ տարբերություն՝ երե՞կ, թե այսօր: Այդ պատճառով «նախընտրական զեղչերը»՝ գազի եւ էլեկտրաէներգիայի սակագների իջեցումը, ոչինչ չեն տա, եւ «Հանրապետականը» կրկին բարդ խնդրի առջեւ է կանգնելու՝ քվեի մասով: Ռեյտինգային համակարգը վերջինիս համար կարծես թե դյուրացնում է ձայներ հավաքելը, բայց միեւնույնն է՝ իրական քվեարկությունը ՀՀԿ-ին չի կարող իշխանության բերել, այդ պատճառով ՀՀԿ-ին կմնա ընտրակեղծարարությունը»:
Լուիզա ՍՈՒՔԻԱՍՅԱՆ
