«Քանի որ Սերժ Սարգսյանը չէր բացառել 2018թ. հետո վարչապետ դառնալու հեռանկարը, կարեւոր հարց էր առաջանում՝ նա Կարեն Կարապետյանին «կճանապարհի» խորհրդարանական ընտրություններից հետո՞, թե ավելի ուշ: ՀՀԿ համագումարը պատասխանեց հարցին՝ մինչեւ Սերժ Սարգսյանի լիազորությունների ժամկետի ավարտը՝ 2018թ.-ը, Սերժ Սարգսյանը «տեղապահ» է նշանակում Կարեն Կարապետյանին, իսկ թե ինչ կանի իր լիազորությունների ավարտից հետո, հարցը բաց է մնում»,-Aravot.am-ի հետ զրույցում անդրադառնալով ՀՀԿ համագումարում հնչած հայտարարությանը, թե առաջիկա խորհրդարանական ընտրություններում վստահության քվե ստանալու դեպքում ՀՀԿ-ի վարչապետի թեկնածուն լինելու է Կարեն Կարապետյանը, ասաց քաղաքագետ Ստյոպա Սաֆարյանը:
Նրա բնորոշմամբ՝ Սերժ Սարգսյանն իր համար կարեւոր քայլ է արել. «Նա նվազեցրել է ռիսկերը՝ կապված թիմի ներսում վարչապետ լինելու համար սուր պայքարի հետ: Սերժ Սարգսյանը մի անգամ դա տեսել է՝ ի դեմս Հովիկ Աբրահամյանի եւ Տիգրան Սարգսյանի պայքարի: Բացի այդ, Սերժ Սարգսյանն իր համար թուլացրեց ռուսական սպառնալիքը: Նախկինում հայաստանյան դերակատարների տեսքով եւ ուղղակիորեն հատկապես 2013-2014թթ. ցույց էր տրվում, որ Տիգրան Սարգսյանն անցանկալի վարչապետ է եւ նրան բառացիորեն պահում է Սերժ Սարգսյանը: Այժմ կարծես թե Սերժ Սարգսյանը չպետք է վախեր ունենա ռուսական կողմնորոշումով քաղաքական ուժերից, որովհետեւ եթե նրանք փորձեն դուրս գալ իշխանության դեմ, կստացվի, որ ցանկանում են դուրս գալ Կարեն Կարապետյանի՝ «Մոսկվայի մարդու» դեմ»:
Ստյոպա Սաֆարյանը չի բացառում, որ այս ամենի համատեքստում Ռուսաստանն ապրիլյան դեպքերից հետո իր հանդեպ վստահությունը վերգտնելու նպատակով ռազմաքաղաքական դաշտում սիրաշահող քայլերի կդիմի. «Գուցե ավելի նրբանկատ դառնան: Վերջին շրջանում նկատելի է, որ ռուսները սառել են եւ մի փոքր վախենում են առաջ մղել Ղարաբաղյան հարցով իրենց պլանը, ինչը նախկինում անում էին շատ լկտի ձեւով»,-նկատեց քաղաքագետը:
Լուիզա ՍՈՒՔԻԱՍՅԱՆ
Կարդացեք նաև
