Երեկ ՀՀ սպորտի եւ երիտասարդության հարցերի նախարարության ներկայացուցչական պատվիրակությունը մեկնեց Լեռնային Ղարաբաղ
«Առավոտի» խնդրանքով նախարար Հրաչյա Ռոստոմյանը ներկայացրեց այցի նպատակները:
-Պարոն Ռոստոմյան: Առաջին անգամ չէ, որ աշխատանքային այցով մեկնում եք ԼՂՀ: Այս անգամ ծրագրերի ի՞նչ փաթեթ եք տանում Արցախ:
-Գնում ենք ավելի գործնական ու ընդգրկուն ծրագրերով: Պատվիրակության կազմն էլ ավելի ներկայացուցչական է. նախարարության մասսայական սպորտի, մանկապատանեկան սպորտի եւ մարզական կազմակերպությունների, սպորտի բարձրագույն նվաճումների վարչությունների պետեր, ներկայացուցիչ՝ երիտասարդական քաղաքականության վարչությունից: Նպատակը՝ Հայաստանի Հանրապետությունում իրականացվող մարզական ավելի խորացված ծրագրերի մասին ԼՂՀ ղեկավարությանը տեղեկացնելն է: Քննարկելու ենք ոլորտային բազմաթիվ հարցեր եւ փորձելու ենք դրանց իրականացման գործում օգտակար լինել Արցախի մեր հայրենակիցներին:
Կարդացեք նաև
-Որքան տեղյակ եմ, «դատարկ ձեռքով» չեք մեկնում:
-Տանում ենք ծանրամարտի անհրաժեշտ մարզագույք, այդ թվում՝ կամրջակ, ծանրաձող, ձյուդոյի եւ թաեքվոնդոյի տատամիներ, այլ մարզաձեւերով զբաղվելու համար գույք եւ այլն: Արցախցին օժտված է բնության տված ուժով: Վստահ եմ, որ քրտնաջան աշխատելու եւ ճիշտ մարզվելու դեպքում մոտ ապագայում այնտեղի մարզիկների ու երիտասարդների բազմաթիվ նոր ձեռքբերումների ականատեսը կլինենք ոչ միայն սպորտում:
-Ծրագրերն ավելի արդյունավետ են կյանքի կոչվում, երբ դրանցով շահագրգռված են ու զբաղվում են առաջին դեմքերը: ԼՂՀ-ում ո՞ւմ հետ եք հանդիպելու:
-Հանդիպումներն ու քննարկումներն ընթանալու են ԼՂՀ նախագահի եւ վարչապետի մակարդակով: Արցախի իշխանությունները նույնպես անչափ կարեւորում են սպորտի եւ երիտասարդության հարցերի ոլորտներում հայաստանյան փորձի ուսումնասիրությունը եւ իրենց մոտ դրա ներդրման անհրաժեշտությունը: Տեղի պատասխանատուների հետ միասին այցելելու ենք մարզադպրոցներ եւ հանրակրթական դպրոցներ: Բազմիցս կրկնել եմ, որ հասարակության ֆիզիկական դաստիարակության գործում մեծ է հանրակրթական դպրոցների դերը, որն ավարտելուց հետո են պատանիները մտնում հասուն կյանք: Հանրակրթական դպրոցներին է վերապահված առողջ, կոփված ու մարտունակ սերունդ աճեցնելու առաքելությունը:
-Ներկայացրիք, թե ծրագրերի ինչ փաթեթներ եք տանում Արցախ: Իսկ այնտեղից նոր գաղափարներ «բերել» ակնկալո՞ւմ եք:
-Հարցի պատասխանը կտամ վերադառնալուց հետո:
-Արցախ եւ ետադարձ ճանապարհն անցնելու է Սյունիքով…
-Հարցի ենթատեքստը հասկացա: Հարմար առիթ է ընձեռվում նաեւ Հայաստանի հարավային մարզերն այցելելու: Վերադարձին կանգառ ենք անելու Կապանում եւ Քաջարանում: Շրջելու ենք մարզադպրոցներում եւ հանրակրթական դպրոցներում՝ ֆիզկուլտուրա առարկայի դասավանդման խնդիրները, դասաժամերի արդյունավետությունը, աշակերտների հաճախելիությունը ուսումնասիրելու: Ձեր հետ նախորդ հարցազրույցներից մեկում տեղեկացրել եմ, որ իմ եւ ԿԳ նախարար Լեւոն Մկրտչյանի համատեղ հրամանով ստեղծվել է միջգերատեսչական հանձնաժողով, որը զբաղվում է հանրակրթական դպրոցներում ֆիզկուլտուրա առարկայի դասավանդման հետ կապված խնդիրների ուսումնասիրությամբ, որոնց արդյունքներն ամփոփելուց հետո ձեռնամուխ է լինելու նաեւ դրանց լուծմանը: Սյունիքում կատարվելիք մեր ուսումնասիրություններն այդ հարցում օգտակար կլինեն:
ԱՇՈՏ ՀԱԿՈԲՅԱՆ
«Առավոտ»
26.11.2016
