«Բանակի համար «1000 դրամի» նախագծում փոփոխություններ կարվեն, սակայն պարտադիր բաղադրիչը չի հանվի»,-այս մասին այսօր ՀՀԿ համագումարից հետո լրագրողների հետ զրույցում ասաց պաշտպանության նախարար Վիգեն Սարգսյանը:
Նախարարն այդ ծրագրում փոփոխությունների մասին ասաց, որ անցկացնում են քննարկումներ, որպեսզի մինչեւ ԱԺ երկրորդ ընթերցում օրենսդրական նախաձեռնությունը որոշակի փոփոխությունների ենթարկվի. «Բայց պետք է ի սկզբանե ասեմ, որ պարտադիր բաղադրիչը չի հանվելու օրենքի նախագծից: Դա այդ օրենքի առանցքային հիմքն է, եւ խմբագրելով դա՝ խմբագրած կլինեինք օրենքի բուն էությունը»:
Հստակեցվող հարցին ի պատասխան՝ որ հայտարարվել էր՝ ով ցանկանա, կարող է դիմում գրել ու հրաժարվել այդ վճարից, այս դրույթը սահմանվելո՞ւ է օրենքում, նախարարը որեւէ կոնկրետ բան չասաց: Վիգեն Սարգսյանը վստահեցրեց, որ այդ հարցը կհստակեցնեն երկրորդ եւ երրորդ ընթերցման ժամանակ:
Ինչ վերաբերում է այն հանգամանքին, որ այդ նախագիծը բավականին քննադատվեց, նախարարն ասաց. «Ես չեմ կիսում այդ գնահատականը, որ եղել է լայն քննադատություն պարզ պատճառով, որովհետեւ քաղաքական դաշտում քննադատությունը գնահատվում է վերջնական քվեարկության արդյունքով: Մենք ունենք օրենք, որն ընդունված է շատ ավելի մեծ կողմ թվերով, քան բազմաթիվ այլ օրենքներ, որոնք ընդունվել են վերջին տարիներին: 102 կողմ ձայնը դա շատ լայն աջակցության քվե է»:
Կարդացեք նաև
Առաջնագծում միայն սոցիալապես անապահով ընտանիքների զավակների ծառայության մասին էլ նախարարն ասաց. «Մենք բազմաթիվ խնդիրներ ունենք զորակոչի կազմակերպման: Դրանցից են՝ մեծ թվով ծառայության չներկայացածները, մենք պայմանավորվել ենք, որ իրավապահ մարմինները պետք է աջակցեն:
Ինձ համար զարմանալի է, որ մեծ թվով մարդիկ ստանում են տարկետումներ, այս հարցով եւս կզբաղվենք: Պետք է հստակ հասկանանք՝ ցանկացած խորքային խնդիր լուծելու համար, պետք է ամբողջական ընթացակարգ ներդնել»:
Նելլի ԲԱԲԱՅԱՆ
