ՀՀԿ նախագահի առաջին տեղակալ հնարավոր է ընտրվի վարչապետ Կարեն Կարապետյանը, որն այսօր ընտրվեց ՀՀԿ ԳՄ անդամ: Այս մասին այսօր լրագրողների հետ զրույցում ակնարկեց ՀՀԿ խոսնակ Էդուարդ Շարմազանովը ՀՀԿ 16-րդ համագումարի ավարտից հետո: Պարոն Շարմազանովն ասաց, որ կուսակցության փոխնախագահները կընտրվեն ՀՀԿ ԳՄ նիստում:
Կուսակցության գործադիր մարմնի անդամների կազմում չեն ընդգրկվել Ռազմիկ Զոհրաբյանը եւ Դերենիկ Դումանյանը: Շարմազանովը վստահեցրեց, որ Ռազմիկ Զոհրաբյանն իր ցանկությամբ դիմել է Սերժ Սարգսյանին եւ առողջական պատճառներով խնդրել, որպեսզի այլեւս չներառվի գործադիր մարմնի անդամ:
Թե ով է լինելու կուսակցության նախագահի առաջին տեղակալը, պարոն Շարմազանովն ասաց՝ «Հաշվի առնելով այն, որ Սերժ Սարգսյանը հայտարարել է, թե ՀՀԿ-ի հաջորդ վարչապետի թեկնածուն Կարեն Կարապետյանն է լինելու, այստեղ բազմակետեր են դրվում»:
Aravot.am-ի այն հարցին՝ Կարեն Կարապետյանը կուսակցության փոփոխությունների խորհրդանիշն է համարվում, ըստ Սերժ Սարգսյանի, եւ նրա ընդգրկմամբ կարող է ՀՀԿ-ի վարկանիշը բարձրացնի, արդյոք կուսակցության՝ խորհրդարանական ցուցակից դուրս կգան այնպիսի պատգամավորներ, որոնք ՀՀԿ-ի վարկանիշը գցում են, պարոն Շարմազանովը պատասխանեց.«Հանրապետականն ամենաքաջն է գիտակցում փոփոխությունների անհրաժեշտությունը: Հանրապետականն ամենալավն է գիտակցում, որ իրեն պետք է բարեփոխվել, վեր հանել թերությունները, բայց մենք որպես պահպանողական ուժ՝ չենք գնում ամեն ինչ ջնջելու եւ նորից սկսելու»:
Կարդացեք նաև
Նելլի ԲԱԲԱՅԱՆ
