Խաչատրյանի 4-րդ միջազգային փառատոնի շրջանակում նոյեմբերի 25-ին կամերային երաժշտության սիրահարներն ունկնդրում էին Կոմիտասի անվան ազգային քառյակի հիանալի կատարումները։ Խաչատրյանի տուն-թանգարանում երկու մասից բաղկացած համերգում հնչել են Ֆրանց Շուբերտի Երրորդ լարային կվարտետը «Ռոզամունդ», Էդվարդ Միրզոյանի «Թեմա և վարիացիաներ» լարային կվարտետը, Կոմիտաս/Ասլամազյան Մանրանվագները լարային քառյակի համար։
Կոմիտասի անվան ազգային քառյակի կազմում են Էդուարդ Թադևոսյանը (առաջին ջութակ), Սյուզի Երիցյանը (երկրորդ ջութակ), Ալեքսանդր Կոսեմյանը (ալտ), Անժելա Սարգսյանը (թավջութակ)։ Ի դեպ, քառյակի մենահամերգը նշանավորվել է շնորհաշատ թավջութակահար Անժելա Սարգսյանի նորամուտով։
Քառյակի առաջին ջութակ, ժողովրդական արտիստ Էդուարդ Թադևոսյանը բարձր է գնահատում Խաչատրյանի անունը կրող փառատոնի դերը երաժշտական կյանքում։ Այն, ըստ պարոն Թադևոսյանի, երաժիշտներին միմյանց, ինչպես նաև հանդիսատեսի հետ շփվելու հնարավորություն է տալիս։ Փառատոնի շրջանակներում տեղի է ունենում ինֆորմացիայի փոխանակում աշխարհի հետ։ Ջութակահարը հատկանշական է համարում, որ Հայաստանի պետական երիտասարդական նվագախումբը կազմակերպում է հայ մեծ կոմպոզիտորի անվան միջազգային մրցույթ և փառատոն։
Կոմիտասի անվան ազգային քառյակն առաջին անգամ էր մասնակցում Խաչատրյանի փառատոնին։ Խոսելով կամերային համերգին ներկայացված ստեղծագործությունների մասին՝ պարոն Թադևոսյանը նկատում է, որ Շուբերտի «Ռոզամունդը» հայտնի կվարտետներից է և շատ գեղեցիկ ստեղծագործություն, ռոմանտիկայի օվկիանոս։ Իսկ Միրզոյանի «Թեմա և վարիացիաներ» լարային կվարտետը գրվել է 1947 թվականին և շատ արդիական է բոլոր ժամանակներում։
Կարդացեք նաև
Նշենք, որ այսօր երեկոյան Խաչատրյանի 4-րդ միջազգային փառատոնի շրջանակում Հայաստանի պետական երիտասարդական նվագախումբը՝ մաեստրո Սերգեյ Սմբատյանի ղեկավարությամբ, «Արամ Խաչատրյան» համերգասրահում կներկայացնի Գուստավ Մալերի 5-րդ սիմֆոնիան։
Հիշեցնենք, որ Խաչատրյանի 4-րդ միջազգային փառատոնը անցկացվում է ՀՀ Նախագահ Սերժ Սարգսյանի հովանու ներքո։ Երաժշտական այս տոնը կազմակերպել են Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ) և «Դասական երաժշտության աջակցություն» ՀԿ-ն՝ ՀՀ մշակույթի նախարարության, «Խաչատրյան» և Մշակույթի աջակցության եվրոպական հիմնադրամների աջակցությամբ։ Փառատոնի հովանավորներն են «Ջերմուկ գրուպ» ընկերությունը, «Անի պլազան», «Երևանի կոնյակի գործարանը», ԱրմՍվիսԲանկը։
Խաչատրյանի 4-րդ միջազգային փառատոն
