Նոյեմբերի 26-ին «Այբ» դպրոցում տեղի ունեցավ Պատանի քիմիկոսների համահայկական 7-րդ մրցաշարի քառորդ եզրափակիչ փուլը: Այս տարի մրցաշարն ունեցավ ռեկորդային թվով մասնակից՝ Հայաստանի ու Արցախի դպրոցների 43 թիմ, 208 մասնակից աշակերտ և 70 մարզիչ ու ղեկավար:
Քառորդ եզրափակչին թիմերը լուծեցին թեստային խնդիրներ, որոնք ստուգվեցին մասնագիտական հանձնաժողովի կողմից, ապա տեղում հրապարակվեցին կիսաեզրափակիչ փուլ անցած 11թիմերի անունները։ Կիսաեզրափակիչ ու եզրափակիչ փուլերը տեղի կունենան 2017 թվականի ապրիլին։
«Մրցաշարը հրաշալի հնարավորություն է բարձր դասարանների աշակերտների համար՝ իրականացնելու իրենց առաջին գիտական հետազոտություններն ու փոքրիկ հայտնագործությունները»,- բացման խոսքում նշեց մրցաշարի համակարգող Նինա Հոբոսյանը:
Պատանի քիմիկոսների համահայկական մրցաշարը (ՊՔՀՄ) «Այբ» կրթական հիմնադրամի բազմաթիվ ծրագրերից մեկն է, որն ուղղված է հանրակրթության ոլորտում տաղանդավոր երեխաների բացահայտմանը: Այն փոխներգործուն (ինտերակտիվ) խաղի սկզբունքով անցկացվող թիմային մրցույթ է, որտեղ 9-12-րդ դասարանների աշակերտները լուծում են քիմիայի բարդ ու հետաքրքիր առաջադրանքներ և բանավիճում գիտական թեմաների շուրջ: ՊՔՀՄ-ի մարտերը դատում է ժյուրին, որի կազմում ներգրավված են ԵՊՀ-ի, ՀԱՊՀ-ի և ՀՊՄՀ-ի դասախոսներ, երիտասարդ գիտաշխատողներ, ուսուցիչներ, այլ մասնագետներ:
Կարդացեք նաև
«Այբ» կրթական հիմնադրամ
