Այսօր ՀՀԿ 16-րդ համագումարին ՀՀ նախագահ Սերժ Սարգսյանի ելույթին անդրադառնալով՝ լրագրողների հետ ճեպազրույցում ՀՀԿ ԳՄ անդամ Սամվել Նիկոյանն ասաց, որ նախագահը հստակ արձանագրել է՝ ՀՀԿ-ն վճռական սատարելու է վարչապետ Կարեն Կարապետյանի կառավարությանը. «Երկրորդը՝ հստակ սահմանեց, որ եթե մեր կուսակցությունը հաջողություններ արձանագրի 2017 թվականի պառլամենտական ընտրություններում, ապա մեր վարչապետի թեկնածուն լինելու է Կարեն Կարապետյանը»:
Ըստ Նիկոյանի, նախագահը ուղերձ է հղել հանրությանը՝ Կարեն Կարապետյանը վեց ամսվա վարչապետ չէ. «Սրանով մենք ասում ենք՝ վարչապետ Կարեն Կարապետյանի եւ ՀՀԿ-ի հարաբերությունները միտված են ապագային, եւ դա լինելու է շարունակական, հատկապես այն փաստից հետո, որ Կարեն Կարապետյանն այլեւս ՀՀԿ-ական է»:
ՀՀԿ-ական, արդարադատության նախարար Արփինե Հովհաննիսյանն էլ նույն ճեպազրույցին ասաց, որ նախագահ Սարգսյանի հայտարարությունը իրավական տեսանկյունից որեւէ խնդրահարույց կողմ չունի եւ ՀՀԿ վարչապետի թեկնածուն լինելու է Կարեն Կարապետյանը, եթե 2017 թվականի ապրիլին սպասվելիք խորհրդարանական ընտրություններում ՀՀԿ-ն հնարավորություն ունենա հաջողությունների հասնել:
Կարդացեք նաև
Այն հարցին, որ 2018-ից հետո իրավական տեսանկյունից սահմանափակում կա՞, որ դարձյալ Կարեն Կարապետյանը լինի վարչապետի թեկնածուն, Արփինե Հովհաննիսյանն ասաց՝ «Սահմանափակումների մասին չէ խոսքը: 2017 թվականի խորհրդարանական ընտրություններին ենթադրյալ մեծամասնությանը հնարավորություն է ընձեռվում ձեւավորել կառավարություն եւ համապատասխանաբար վարչապետի իր թեկնածուին: 2018 թվականի ապրիլից հետո մենք Սահմանադրությամբ ունենալու ենք նոր իրողություններ՝ գործող նախագահի լիազորությունների ժամկետի ավարտ, հետեւաբար պառլամենտական հանրապետության բոլոր դրսեւորումներն իրենց ողջ ներկապնակով: Իսկ սա նշանակում է, որ այդ ժամանակահատվածում խորհրդարանական մեծամասնությունը ով էլ լինի, ինչպիսի ներկայացվածություն էլ ունենա, կրկին անգամ ձեւավորելու է իր կառավարությունը: Բայց դա այլեւս կապ չի ունենալու այն թեզի հետ, որն առաջ է քաշել հանրապետության նախագահը»:
Նելլի ԲԱԲԱՅԱՆ
