ՀՀ վարչապետ Կարեն Կարապետյանի հետ վերջերս կայացած հանդիպմանը թռչնաբույծները ոլորտի մի շարք խնդիրներ են բարձրաձայնել: Մասնավորապես, առաջարկել են ֆինանսական խնդիրներ ունեցող արտադրողներին ընդառաջել եւ օգնել վարկերը սուբսիդավորելու, կամ երկրատեւ վարկեր տրամադրելու հարցում: Այս մասին այսօր «Տեսակետ» մամուլի ակումբում լրագրողներին հայտնեց «Հայաստանի թռչնաբույծների միություն» հ/կ նախագահ Սերգեյ Ստեփանյանը: Նա տեղեկացրեց, որ խոսքը տարեկան 5-5.5% վարկերի մասին է՝ 13% վարկերի փոխարեն: «Մեր առաջարկն ընդունվել է: Տեսնենք՝ առաջիկա գործողություններն ինչպես կընթանան»,-ասաց Սերգեյ Ստեփանյանը:
Թռչնաբույծները վարչապետին նաեւ առաջարկել են օգնել՝ ավելացնել թռչնամսի արտադրական ծավալները, Կարեն Կարապետյանն էլ գյուղատնտեսության նախարարությանը հանձնարարել է թռչնաբույծների հետ ոլորտի զարգացման նախագծեր մշակել: «Տեղական թռչնամսի եւ ձվի արտադրության աճի հնարավորություն կա: Հնարավոր է մոտ 11 հազար տոննայով ծավալի կտրուկ աճ ապահովել: Ըստ մեր ներկայացրած ծրագրի՝ 2025թ.-ին հնարավոր է 24.000 տոննայի հասցնել արտադրությունը»,-նշեց Ստեփանյանը:
Թռչնաբույծների «հարցերի հարցը» թռչունների կերային բազայի ապահովումն է, եւ այս հարցում եւս ոլորտի ներկայացուցիչները առաջարկ են արել վարչապետին, որը, Սերգեյ Ստեփանյանի խոսքով, ռուսաստանյան մոդել է. «Առաջարկել ենք, որ Կառավարությունը ՌԴ-ից բերքահավաքի ժամանակ, երբ կերը էժանանում է, գնումներ կատարի: Եթե հարցը լուծվի, մոտակա տարիներին թռչնամսի գնի անկման հնարավորություն կլինի»:
Կարդացեք նաև
Լուիզա ՍՈՒՔԻԱՍՅԱՆ
