ՄԱԿ-ի՝ Կանանց նկատմամբ խտրականության բոլոր ձևերի վերացման մասին կոնվենցիայի կոմիտեն հրապարակել է իր եզրակացությունները 11 երկրներում, այդ թվում Հայաստանում, կանանց իրավունքների պաշտպանության վերաբերյալ:
Հայաստանին վերաբերող եզրակացության մեջ նշվում է, որ Հայաստանում կանայք զրկված են հնարավորությունից՝ աշխատելու այն մասնագիտություններով, որոնք «վնասակար» են նրանց վերարտադրողականության համար: Ուստի Կոմիտեն Հայաստանին պարտավորեցրել է փոխել «կանանց համար վտանգավոր մասնագիտությունները» ցանկը:
Բացի այդ, Կոմիտեն պարտավորեցրել է քրեականացնել միասեռական կանանց նկատմամբ ատելության խոսքը և ատելության հողի վրա նրանց դեմ կատարված հանցագործությունները:
Նշվում է, որ ըստ LGBT-կազմակերպությունների, 2015թ. Հայաստանում սեռական փոքրամասնությունների ներկայացուցիչների դեմ ատելության հողի վրա կատարվել է 45 հանցագործություն, չնայած, ըստ փորձագետների, դրանց թիվը շատ ավելի մեծ է:
Կարդացեք նաև
Հայաստանին խորհուրդ է տրվել նաև հարգել խոցելի խմբերի պատկանող կանանց իրավունքները՝ ազգային փոքրամասնություններ և միգրացիայի ենթարկված կանայք:
Նշվում է, որ ծանր վիճակում են գտնվում գյուղաբնակ կանայք, որոնք կախվածության մեջ են հայտնվել արտագնա աշխատանքում գտնվող իրենց ամուսիններից:
Բացի այդ, եզրակացության մեջ նշվում է, որ ազգային փոքրամասնությունների ներկայացուցիչները հաճախ չեն ունենում հավասար իրավունքներ արդարադատության, կրթության, առողջապահության և սոցիալական պաշտպանության ոլորտներում:
Պատրաստեց՝ Վիկտորյա ԱՆԴՐԵԱՍՅԱՆԸ
