Մարդու իրավունքների եվրոպական դատարանը հինգշաբթի երկու նոր վճիռ է կայացրել Հայաստանի դեմ:
Մասնավորապես, Ստրասբուրգի դատարանը վճռել է որպես փոխհատուցում 50 հազար եվրո հատկացնել 2002թ. Լեռնային Ղարաբաղում զոհված Սուրեն Մուրադյանի ընտանիքին: Դատարանը վճռել է, որ ռազմական իշխանությունները ինչպես հարկն է՝ չեն քննել նրա մահվան հանգամանքները և պատժել մեղավորներին:
Դատական հայցը ներկայացվել էր Սուրենի հոր՝ Հրաչ Մուրադյանի կողմից: Դրանում ասվում էր, որ զորակոչիկը մահացել է լուրջ հիվանդությունից, որովհետև իր ծառայության ընթացքում երբևէ պատշաճ բժշկական օգնություն չի ստացել:
Երկրորդ վճռով դատարանը կարգադրել է Հայաստանի իշխանություններին 2400 եվրո վճարել 2009թ. սպանության համար դատապարտված Սպարտակ Մանուչարյանին: Դրանում ասվում է, որ Հայաստանի իշխանությունները խախտել են Մանուչարյանի՝ արդար դատավարություն ստանալու իրավունքը: Մասնավորապես, դատարանը արհամարհել է Մանուչարյանի բողոքն առ այն, որ ինքը Ալավերդիում կատարված սպանությունն իր վրա է վերցրել, քանի որ նախադատական հարցաքննության ժամանակ իր վրա ճնշում է գործադրվել:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
