ԿԳՆ-ում այսօր լրագրողների հետ հանդիպմանն Aravot.am-ը հանրակրթության վարչության պետ Նարինե Հովհաննիսյանին խնդրեց մեկնաբանել լեզվաբան Լավրենտի Միրզոյանի կարծիքը, որ պարտադիր չէ ռուսերենը երկրորդ պետական լեզու հռչակել, դրա փոխարեն կարելի է ռուսերենի խորացված ուսուցման ծրագրեր ներդնել:
«70 տարի՝ մենք դա ունենք՝ լեզուների խորացված ուսուցում: Դա կարող է լինել ռուսերենով, անգլերենով: Մեր ուսումնական պլանը թույլ է տալիս, որ դպրոցն ընտրի իրեն հարմար որեւէ լեզվի խորացված ուսուցում եւ դա անի»,-ասաց Նարինե Հովհաննիսյանը:
«Բացի այդ, ունենք առանձին դպրոցների ցուցակ, որոնք նախարարի հրամանով ճանաչվել են որպես, օրինակ, ռուսերենի խորացված ուսուցում իրականացնող: Այդպիսի դպրոցներին հնարավորություն ենք տվել այլընտրանքային դասագրքերով սովորել, միջոցառումների մասնակցել»,-հավելեց նա:
Թե որքանով են աշակերտները հետաքրքրված ռուսերենով, Նարինե Հովհաննիսյանն ասաց, որ միասնական քննությունների պատկերից դատելով՝ անգլերենը գերադասելի է ռուսերենից:
Կարդացեք նաև
Նարինե Հովհաննիսյանը ռուսերենը ՀՀ երկրորդ պետական լեզու հռչակելու շուրջ իր անձնական կարծիքը չարտահայտեց՝ ասելով, որ ԿԳ նախարարն արդեն իսկ մեկնաբանել է հարցը:
Լուիզա ՍՈՒՔԻԱՍՅԱՆ
