Լեզվաբան, Լեզվի պետական տեսչության նախկին պետ Լավրենտի Միրզոյանն այսօր «Պոստ Սկրիպտում» մամուլի ակումբում անդրադարձավ այլ լեզուներով, մասնավորապես՝ ռուսերենով անցկացվող պետական-պաշտոնական միջոցառումներին՝ ասելով, որ դա լեզվի մասին օրենքի կոպիտ խախտում է. «Լեզվի պետական տեսչությունը պետք է համապատասխան ակտ կազմի, ուղարկի դատարան, որը կորոշի՝ որքա՞ն տուգանել»:
Միրզոյանը նշեց, որ իր պաշտոնավարման տարիներին՝ 2004-2010թթ. նման դեպքեր գրանցվում էին, սակայն նկատեց, որ վերջին տարիներին պատժվող պաշտոնյաներ չեն եղել. «Այն ժամանակ բոլորը պահպանում էին կանոնը՝ բոլորին հորդոր էինք ուղարկում, նաեւ ԱԺ-ին: Զգաստանում էին, որպեսզի Լավրենտի Միրզոյանի ուշադրության կենտրոնում չհայտնվեին»:
Թե որ պաշտոնյաները դրական շեշտադրմամբ չեն հայտնվել Միրզոյանի ուշադրության կենտրոնում, Լեզվի պետական տեսչության նախկին պետն առանձնացրեց Սփյուռքի նախարար Հրանուշ Հակոբյանին. «Այն ժամանակ Հրանուշ Հակոբյանին ճանաչեցինք որպես մաքուր հայերենով խոսող պատգամավոր: Հաղորդավարներից էլ կառանձնացնեմ Արտակ Հերիքյանին»:
Կարդացեք նաև
Լեզվաբանը նաեւ դժգոհեց, որ այսօր մայրենին բավարար ուշադրության չի արժանանում: Օրինակ՝ հյուրանոցների վրա հայերենի փոխարեն անգլերեն կամ ռուսերեն գրություններ են. «Բանը հասել է նրան, որ նախարարները անգլերեն են ստորագրում»,-նկատեց Լավրենտի Միրզոյանը:
Լուիզա ՍՈՒՔԻԱՍՅԱՆ
