Սկանդալային դոպինգ ցուցակում հայտնվելու եւ մարզական միջազգային ատյաններում ծանրորդներ Հռիփսիմե Խուրշուդյանի, Տիգրան Մարտիրոսյանի նկատմամբ կայացվելիք հնարավոր որոշումների շուրջ բուռն քննարկումները մեդիա դաշտում եւ սոցցանցերում շարունակվում են:
Լրատվամիջոցներին հուզող բոլոր հարցերին այսօր «Արմենպրեսի» մամուլի սրահում հրավիրված ասուլիսում պատասխանեցին Հայաստանի ծանրամարտի ֆեդերացիայի գլխավոր քարտուղար եւ տղամարդկանց ազգային հավաքականի գլխավոր մարզիչ Փաշիկ Ալավերդյանը, Եվրոպայի գործող չեմպիոն եւ ՌԴ նախագահի գավաթի խաղարկության հաղթող Հռիփսիմե Խուրշուդյանը, նրա անձնական մարզիչ եւ աղջիկների պատանեկան հավաքականի ավագ մարզիչ Արման Ղազարյանը:
Բանախոսները ամենայն մանրամասնությամբ ներկայացրին համաշխարհային ծանրամարտի խոհանոցը, տիրող ընդհանուր իրավիճակը, հստակ մատնացույց արեցին, թե կարգազանց մարզիկների ճակատագրի հետ կապված որ միջազգային կառույցը ինչ գործառույթներ եւ իրավասություններ ունի, որոնք տարանջատել չկարողանալու պատճառով է մեդիա դաշտում եւ սոցցանցերում այսպիսի խառնաշփոթ վիճակ առաջացել:
Կարդացեք նաև
Փաշիկ Ալավերդյանն առանձնահատուկ անդրադարձավ մեր ծանրորդների որակազրկման կամ չորակազրկման շուրջ շրջանառվող ասեկոսեներին՝ նշելով, որ որոշում կայացնելու իրավունք ունի միայն մարզաձեւի միջազգային ֆեդերացիան: Իսկ թե դա երբ կլինի ու մարզիկների հետագա ճակատագրի մասին ինչ վճիռներ կկայացվեն, հայտնի չէ՝ պետք է սպասել:
Արման Ղազարյանը խոսեց որակազրկում տերմինի մասին՝ հիշեցնելով, որ թե Հռիփսիմեն, թե Տիգրանը, եթե Ռիոյից առաջ, կամ հետո որակազրկված լինեին, չէին մասնակցի Եվրոպայի առաջնությանը, իսկ Հռիփսիմեն՝ նաեւ Վլադիմիր Պուտինի գավաթի խաղարկությանը: «Մեր բոլոր ծանրորդներն էլ տարվա ընթացքում մի քանի անգամ դոպինգ ստուգումներ են անցնում, նաեւ միջազգային պաշտոնական մրցումների սկզբում եւ վերջում, որոնց պատասխանները հրապարակվում են 48 ժամվա ընթացքում: Այնպես որ, եթե որակազրկում լիներ, նրանց նույն պահին տուն կուղարկեին», – ասաց նա:
Ինքը՝ Հռիփսիմե Խուրշուդյանը, հայտարարեց, որ ցանկանում է շարունակել ծանրորդի կարիերան եւ շարունակում է մարզվել, պահպանել մարզավիճակ, քանի դեռ IWF-ի վերջնական վճիռը չկա: Իսկ հետագան ավելի հստակ պարզ կլինի միայն այդ որոշումից հետո: Փաշիկ Ալավերդյանն էլ ավելացրեց, որ կանանց ծանրամարտում եկող տարվանից նոր՝ 90 կգ քաշային կարգ է ավելացվում, ինչը, ասես, հենց Հռիփսիմեի համար է արված:
Աշոտ ՀԱԿՈԲՅԱՆ
