Հայաստանի արդյունաբերողների եւ գործարարների միության նախագահությունը քննարկել է ՀՀ Տնտեսական Մրցակցության Պաշտպանության Պետական Հանձնաժողովի կողմից (ՏՄՊՊՀ) «Երեւանի գարեջուր» ընկերությանը 110 միլիոն դրամի չափով տուգանելու մասին որոշումը եւ անհրաժեշտ է համարում հայտարարել հետեւյալը՝ ՀՀ ՏՄՊՊՀ որոշման քննարկումը մեզ հիմք է տալիս պնդելու, որ այն զուրկ է բովանդակային ծանրաբեռնվածությունից, իսկ դրա որոշ դրույթներ պարզապես հակասում են շուկայի տրամաբանությանը:
Մասնավորապես, դժվար է հասկանալ, թե խիստ մրցակցային դաշտում ապրանքի գնի բարձրացումը (ինչը ենթադրում է բյուջեի լրացուցիչ մուտքեր) ինչպես կարելի է դիտարկել որպես գերիշխող դիրքի չարաշահում: Հասկանալի չէ նաեւ, թե ինչ չափանիշներով է հանձնաժողովը ապրանքի գնի բարձրացումը դիտարկում որպես չհիմնավորված՝ դրանով իսկ սահմանափակելով տնտեսվարող սուբյեկտի իրավունքները գնային քաղաքականության իրականացման հարցում:
Լուրջ տարակուսանք են առաջացնում նաեւ հանձնաժողովի գործելաոճը, դրան անհրաժեշտ թափանցիկության պակասը:
ՏՄՊՊՀ-ի որոշման վերլուծությունը մեզ հիմք է տալիս նաեւ հայտարարելու, որ լուրջ փոփոխությունների կարիք ունի «Տնտեսական մրցակցության պաշտպանության մասին» ՀՀ օրենքը՝ բացառելու համար այնտեղ առկա իրարամերժ դրույթներն ու տարընթերցումի հնարավորությունը, ինչը, փաստորեն, ցանկության դեպքում, կարող է օգտագործվել միակողմանի եւ կամայական որոշումների կայացման համար:
Կարդացեք նաև
Կարծում ենք, որ քննարկվող որոշման ընդունումը անարդարացիորեն հարվածում է ներքին եւ արտաքին շուկաներում ճանաչում ձեռք բերած ընկերության վարկանիշին եւ հակասում է Հայաստանի Հանրապետության կառավարության կողմից հռչակված պետություն-բիզնես փոխհարաբերությունների ձեւավորման սկզբունքներին:
Հայաստանի արդյունաբերողների եւ գործարարների միությունը հույս է հայտնում, որ հանձնաժողովը կկասեցնի որոշման ընդունումը եւ կձեռնարկի մասնագիտական թափանցիկ քննարկումներ՝ բոլոր շահագրգիռ կողմերի մասնակցությամբ:
Հայաստանի արդյունաբերողների եւ գործարարների միության նախագահություն
Էս ինչի սաղ սենց Պիվի Հակոբի պաշտպանները դառան: Գիտեք ինչ, մեզ լավ էլ հասնումա, որ մեր հաշվին հարստանում են, նույն Հակոբ Հակոբյանի նման 8 միլիոն դոլլար հայտարարագրում, ում եք պաշտպանում, չեմ հասկանում: Դե ուրեմն լավ էլ անում են, որ ձեր գրպաններն են մտնում ու ձեր երեխեքի փողի հաշվին հարստություն դիզում: Արսեն Ղազարյանը լավ կլինի նորմալ ու արդար աշխատող մի հասարակ գործարարի կողքին կանգնի, ոչ թե որտեղ պատգամավորի ու նախարարի բիզնես կա, ինքը դրանց պաշտպաննա
Արտադրության կազմակերպումը անչափ բարդույթներ ունի: Ըստ այդմ կոչ եմ անում կառավարությանը պաշտպանելու բարեխիղճ արտադրողների շահերը անհարգի ստուգումներից: Գյումրեցիների համար էլ թանկ է գարեջրի գործարանի, և ոչ միայն այդ ձեռնարկության, այլ բոլոր արտադրողների հաջողությունը: Սա առևտուր չէ: Այստեղ է հենց ձևավորվում կոլեկտիվ կոչվածը իր շատ դրական արդյունքներով: