Այսօր կառավարության նիստին արդարադատության նախարար Արփինե Հովհաննիսյանը բավականին երկարաշունչ ելույթ ունեցավ, ավելի կոնկրետ՝ որոշման նախագիծն այնքան երկար զեկուցեց, որ վարչապետ Կարեն Կարապետյանն ասաց. «Այսօր ռեկորդ կարող էինք սահմանել, եթե տիկին Հովհաննիսյանի ու պարոն Թովմասյանի դեբատը չլիներ: Համ հայտարարություն արեցինք, համ կառավարության նիստ արեցինք, համ էլ պարոն Թովմասյանի դեբատը»:
Արփինե Հովհաննիսյանի զեկուցման ժամանակ ԱԺ աշխատակազմի ղեկավար Հրայր Թովմասյանը դիտարկում արեց, ու բավականին երկար տեւեց նրանց երկխոսությունը «ԱԺ կանոնակարգ» օրենքի նախագծի քննարկման ժամանակ:
Կարեն Կարապետյանին այս երկխոսությունն ակնհայտորեն դուր չեկավ: Վարչապետը նշեց, որ մինչ նիստի օրակարգին ներկայացնելը՝ նման հարցերը նախապես պետք է մասնագիտական քննարկման ենթարկվեն. «Պարոն Թովմասյան, հիմա դուք մասնագիտական դեբատ եք անում, ինչ-որ բաներ եք ասում, մյուսները նստած մասնակցում են: Առանց այն էլ սա իմ օրոք ամենաերկար զեկույցն էր, առանձին կքննարկեք իրար հետ»:
Նելլի ԲԱԲԱՅԱՆ
