«Հեռարձակման թվայնացման համատեքստում դրված է մարզային հեռուստաընկերությունների գործել-չգործելու հարցը»,-այսօր Խոսքի ազատության պաշտպանության կոմիտեի կազմակերպած «Հեռարձակման թվայնացումը եւ դրա հետ կապված մարտահրավերները մարզերում գործող հեռուստաընկերությունների համար» թեմայով քննարկմանը նշեց ԽԱՊԿ նախագահ Աշոտ Մելիքյանը:
Նա քննարկմանը մասնակից մարզային հեռուստաընկերությունների ներկայացուցիչներին տեղեկացրեց, որ օրերս նշյալ խնդրով առանձնազրույց է ունեցել ԱԺ Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանի հետ. քննարկել են մասնավոր մուլտիպլեքսների եւ մասնավոր հեռուստաընկերությունների լիցենզավորման գործընթացը պարզեցնելու օրինագծի առաջադրման հարցերը:
«Զրույցի ժամանակ ասվեց, որ նման լուրջ օրենսդրական նախաձեռնություններ կարող են իրականացվել միայն առաջիկա խորհրդարանական ընտրություններից հետո, քանի որ քաղաքական ուժերը զբաղված են լինելու քարոզարշավով: Այսինքն, եթե սպասենք ընտրությունների ավարտին, մարզային TV-ները կդադարեն գործել, որովհետեւ կորցնում են իրենց լսարանը»,- նկատեց Աշոտ Մելիքյանը:
Նա նաեւ հայտնեց, որ նույն խնդրով հանդիպում է ունեցել նաեւ նախագահականում, որտեղ պատասխանել են՝ քանի որ ընտրությունների փուլ է գալիս, օրենսդրական փոփոխությունները գրեթե անհնար են: Սակայն, Մելիքյանի փոխանցմամբ՝ նախագահականից խոստացել են առաջիկայում փորձել մարզային TV-ների համար որոշակի լուծումներ գտնել:
Կարդացեք նաև
Քննարկմանը ներկա «Հայաստանի հեռուստատեսային եւ ռադիոհաղորդիչ ցանց» ՓԲԸ-ի գլխավոր տնօրեն Գրիգոր Ամալյանը նշեց, որ մարզային TV-ներին հնարավոր է ժամանակավորապես ինտեգրել հանրային հեռարձակման թվային ցանց, սակայն դա նշյալ հեռուստաընկերությունների համար տեխնիկական ծախսեր է ենթադրում:
Հիշեցնենք, որ մարզային հեռուստաընկերությունները բաց նամակ էին հղել ՀՀ նախագահին՝ ներկայացնելով անալոգային հեռարձակման անջատման հետեւանքով ստեղծված խնդիրները:
Մանրամասները՝ տեսանյութում:
Լուիզա ՍՈՒՔԻԱՍՅԱՆ
