«Կինոյի պատմությունը «հիմա»-ով գնահատելը սխալ է»,-համոզված է աշխարհահռչակ կինոռեժիսոր Արտավազդ Փելեշյանը:
Այսօր Մշակույթի նախարարությունում լրագրողների հետ հանդիպմանը խոսելով հայկական կինոարտադրության ապագայի մասին՝ նա այսպիսի համոզմունք հայտնեց. «Կգա ժամանակ՝ ամեն ինչ տեղը կընկնի, շատ լավ բաներ կլինեն: Ե՞րբ…օրինակ՝ շատ եմ լսել, որ Չալդրանյանն անընդհատ ֆիլմեր է նկարում, որոնք համարվում են «Օսկարի» արժանի ֆիլմեր: Նայեցի «Համլետ»-ը՝ հիանալի գործ՝ հիանալի…Հետո նայեցի վերջին ֆիլմը՝ Կոմիտասին նվիրված «Վարդապետի լռությունը»: Հոյակապ արված, բայց բովանդակային տեսանկյունից դժվար ֆիլմ է: Դժվարությունը կանցնի, դժվարության պատճառով չի կարելի ֆիլմը քարկոծել: Չալդրանյանին պետք է ընդառաջել՝ շատ լուրջ ռեժիսոր է: Մեծ կինոյի ապագան նրա մեջ է, նրա մոտ է»:
Փելեշյանի խոսքով՝ եթե ֆիլմն այսօր դժվար հասկանալի է, վաղն անպայման հասկանալի կդառնա. «Ամեն ինչ տեղը կընկնի: Ռուսաստանում, օրինակ, կամաց-կամաց անցնում են լուրջ ֆիլմերի»:
Վարպետը նաեւ ասաց, որ վերջերս դիտել է Ռուբեն Գեւորգյանցի՝ Տոնինո Գուերային նվիրված «Հրաշագործի աշունը» ֆիլմը: «Հիանալի ֆիլմ է»,-Գեւորգյանցի աշխատանքն այսպես գնահատեց վարպետը:
Կարդացեք նաև
Լուիզա ՍՈՒՔԻԱՍՅԱՆ
