Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում նոյեմբերի 22-ին շարունակվում էր Արման Առաքելյանի եւ Արարատ Խանդոյանի գործի քննությունը:
Դատարանը դիմում էր ստացել տասնյակ տուժողներից, որպեսզի հիմք ընդունեն նախաքննական ցուցմունքները: Իսկ տուժողներից 17-ը դիմում էին ներկայացրել, որ քաղաքացիական հայց չունեն:
Դատավոր Մնացական Մարտիրոսյանը հետաքրքրվեց, թե տուժողներից ոմանց բացակայությամբ հնարավո՞ր է դատական նիստն անցկացնել, Արարատ Խանդոյանը պատասխանեց՝ այո՝ պնդելով, որ իրենք գործով տուժողներ չեն. «Իրենք լինելով քրեաօլիգարխիկ ռեժիմի ներկայացուցիչներ, ընդհակառակը՝ խաղաղ ցուցարարների վրա հարձակվողներն են»:
Դատարանը նախազգուշացրեց Խանդոյանին՝ դատավարության մասնակից անձանց հասցեին որեւէ վիրավորական արտահայտություն չանել: Արարատ Խանդոյանը շարունակեց. «Իրենք ոչ թե տուժող են, այլ ընդհակառակը՝ խաղաղ ցուցարարների նկատմամբ նռնակներ են կիրառել, լուսաձայնային սնարյադներ: Իրենք կիրառել են մեզ վրա՝ ժողովրդի վրա, ժողովրդի մի մասնիկն էլ ես եմ: Խաղաղ ցույցը ցրելու համար իրենք այդ գործողությունն են կատարել: Նաեւ այդ գործողությունը կատարելիս իրենք իրենց ոստիկանության աշխատակիցներին են վնասել՝ մեզնից բացի»:
Կարդացեք նաև
Մնացական Մարտիրոսյանը ասաց, որ դատարանը երկու միջնորդություն է ստացել տեսակցության արգելանքի վերացման մասին: Արա Ղարագյոզյանը հայտարարեց, որ երկու նույնաբովանդակ միջնորդություն է ներկայացրել Արարատ Խանդոյանի եւ Արման Առաքելյանի մասով եւ պնդում է իր միջնորդությունները: Արա Ղարագյոզյանը ընդգծեց, որ նախաքննությունը ավարտվել է եւ նախաքննական մարմնի որոշման անհրաժեշտությունն արդեն վերացել է: Դատարանը որոշեց միջնորդությունները թե՛ Խանդոյանի, թե՛ Առաքելյանի մասով ամբողջությամբ մերժել:
Արա Ղարագյոզյանը մեկ այլ միջնորդություն ներկայացրեց Արարատ Խանդոյանի նկատմամբ որպես խափանման միջոց ընտրված կալանքը գրավով փոխարինելու մասին: Դատարանը հեռացավ խորհրդակցական սենյակ՝ որոշում կայացնելու:
Ըստ մեղադրական եզրակացության՝ Արարատ Խանդոյանին մեղադրանք է առաջադրվել այն բանի համար, որ նա 2016թ. հուլիսի 20-ին Երեւան քաղաքում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով, արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ձեռքերով եւ ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը:
Իսկ Արման Առաքելյանին մեղադրանք է առաջադրվել այն բանի համար, որ նա 2016թ. հուլիսի 20-ին Երեւան քաղաքում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով, արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` առարկա նետել, ինչպես նաեւ ձեռքերով եւ ոտքերով հարվածներ հասցրել ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին:
Ամի ՉԻՉԱԿՅԱՆ
Կեղտոտ ստահակներ, կեղծ դատարան ինչ է դու խելքտ ու խիղճտ կորցրել ես, քեզ թելադրում են ինչ-որ մի ստրուկ ռեժիմ, որ 25 տարի հայ ժողովրդին սպանդի են վերածել.. ուրիշները պետք է դատավորներին թելադրեն, որ ոնց ուզեն այդպես էլ շարժվեն, հազար ամոթ, խայտառաք դատավորներին, և բոլոր ինքնիշխանություններին, Հայ ժողովրդի խայտառակություն դուք երկար չեք ապրի…