«Աշխատանք» մարզադահլիճում անցած հանգստյան օրերին անցկացվեց կիոկուշին կարատեի Հայաստանի բաց առաջնությունը, որին մասնակցեցին նաեւ Արցախի, Իրանի, Վրաստանի, Լիբանանի, Ռուսաստանի շուրջ 500 ներկայացուցիչներ: Առաջնությունն անցկացվեց տարիքային երկու խմբերում՝ 8-15 եւ 15-ից բարձր տարեկաններ, որոնց մասնակցեցին նաեւ աղջիկները:
Երկօրյա պայքարում մեր մարզիկներն ընդհանուր առմամբ նվաճեցին 16 ոսկե, 13 արծաթե եւ 14 բրոնզե մեդալ: Առանձնապես տպավորիչ էր բացարձակ քաշային կարգում Հովհաննես Սարգսյանի եւ Վրաստանի փորձառու եւ բարձրակարգ ներկայացուցչի եզրափակիչ մենամարտը, որը համառ պայքարից հետո ավարտվեց հայաստանցու հաղթանակով: Հովհաննեսի հաղթանակը կարեւոր էր նրանով, որ նա բոլորովին վերջերս է ավարտել ծառայությունը հայկական բանակում: Հատկապես վերջին շրջանում տարբեր մարզաձեւերի մասնագետներ տրտնջում են, թե որոշակի հաջողությունների հասած կամ հեռանկարային մարզիկները, զորակոչվելով բանակ, այնուհետեւ չեն կարողանում մինչ այդ ունեցած սպորտային մակարդակը պահպանել եւ հեռանում են՝ այլ մասնագիտություն ընտրելով: Իսկ Հովհաննեսի այս հաղթանակը ցույց է տալիս, որ դա այնքան էլ այդպես չէ: Եվ եթե երիտասարդը որոշել է անպայման վերադառնալ սպորտ, դա հնարավոր է: Ինքը՝ Հովհաննեսը, ասում է, որ բանակն իրեն հոգով ու մարմնով ավելի է կոփել ու ամրապնդել:
ԱՇՈՏ ՀԱԿՈԲՅԱՆ
Կարդացեք նաև
«Առավոտ»
22.11.2016
