«Ծրագիրը համակարգային է՝ այն ուղղված է զինված ուժերում մարդու իրավունքների պաշտպանությանը, սակայն չի սահմանափակվում իրազեկվածության բարձրացմամբ կամ էպիզոդիկ խնդիրների վերլուծությամբ»,- նոյեմբերի 21-ին «Զինված ուժերում մարդու իրավունքների եվրոպական չափանիշների կիրառման ամրապնդումը Հայաստանում» ծրագրի բացման արարողության ընթացքում ասաց պաշտպանության նախարար Վիգեն Սարգսյանը:
Նա նշեց, որ ծրագիրը հստակ տեսլական ունի զինված ուժերի խորքային գնահատման հիման վրա զարգացնել կարողություններ, որոնք կնպաստեն ներխմբային կոնֆլիկտների նվազեցման համար նպաստավոր միջավայրի ձեւավորմանը, իրավունքների խախտումների կանխարգելմանը, դրանց ընթացիկ պաշտպանությանը, ինչպես նաեւ առկա պաշտպանության մեխանիզմների կատարելագործմանը. «Ծրագրի կարեւորությունը էլ ավելի է ընդգծվում այն հանգամանքով, որ շահառու են հանդիսանում նաեւ ավանդաբար բացասականորեն թիրախավորված ուժային կառույցները, ինչը հաճախ շատ անհիմն է համարվում: Ձեւավորված այդ կարծրատիպային մտածելակերպը կարող է հեշտությամբ փոփոխվել, եթե ներդրվեն համապատասխան ընթացակարգեր, եւ լինեն այն հնարավորությունները, որոնք ապահովում են յուրաքանչյուրի իրավունքների լիարժեք ապահովումը պաշտպանությունը:
Հատկապես զինված ուժերում դա կարեւոր է, որովհետեւ մենք գործ ունենք փակ համակարգի հետ, որտեղ մարդու իրավունքի հետ կապված հարցերը կարող են ստանալ այլ ավելի սուր բնույթ: Եվ մենք կարիք ունենք մեթոդական աշխատանքով նաեւ հետադարձ կապի ամրապնդման միջոցով բոլոր շահառու եւ շահագրգիռ կազմակերպությունների հետ փոխգործակցությամբ ակտիվ աշխատելով, քաղաքացիական հասարակության հետ շատ ակտիվ աշխատելով ձեւավորել այնպիսի միջավայր, որպեսզի քաղաքացին իմանա, որ զորակոչվելով ժամկետային զինվորական ծառայության կամ անցնելով ծառայություն զինված ուժերում որպես ենթասպա կամ սպա, ինքը հնարավորություն ունի լիարժեքորեն պաշտպանելու իր իրավունքները եւ ազատությունները»:
Ամի ՉԻՉԱԿՅԱՆ
