Թուրքագետ, արեւելագետ Ռուբեն Սաֆրաստյանն այսօր «Փաստարկ» մամուլի ակումբում մեկնաբանեց Թուրքիայի փոխվարչապետի վերջին հայտարարությունը: Հիշեցնենք, որ նոյեմբերի 20-ին Թուրքիայում ընթացող ՆԱՏՕ-ի խորհրդարանական վեհաժողովում Թուրքիայի փոխվարչապետ Մեհմեդ Շիմշեքն ասել էր, որ Թուրքիան ՀՀ-ի հետ սահմանը կբացի այն դեպքում, եթե Հայաստանը «դադարեցնի Ադրբեջանի տարածքների օկուպացիան»: Ռուբեն Սաֆրաստյանը նախ նկատեց, որ հայտարարության ուղերձը նոր չէ, Թուրքիան այս համատեքստում մշտապես շահարկել է Արցախի հարցը:
«Դա Թուրքիայի քաղաքականության մի մասն է, որի նպատակն է՝ ճնշում գործադրել ՀՀ-ի վրա եւ ՀՀ-ին ցույց տալ, որ՝ «տեսեք, մենք պատրաստ ենք սահմանը բացել»: Սա եւս մեկ անգամ Թուրքիային հնարավորություն է տալիս պնդելու, որ Արցախն Ադրբեջանի «օկուպացված» տարածքն է: Ինչը, սակայն, ընդունելի չէ աշխարհի շատ երկրների կողմից»,-նկատեց Ռուբեն Սաֆրաստյանը:
Հիշեցնենք՝ հայ-թուրքական սահմանի բացմանն անդրադարձել էր նաեւ նախագահ Սերժ Սարգսյանը:
Ռուբեն Սաֆրաստյանն անդրադարձավ նաեւ նույն վեհաժողովում Կորյուն Նահապետյանի ելույթին, որում ընդգծվել էր Թուրքիայի՝ իսլամականներին օժանդակելու փաստը: «Ճիշտ եւ կարեւոր մոտեցում է: Պետք է աշխարհի ուշադրությունը հրավիրել այն հանգամանքի վրա, որ Թուրքիան աջակցում է իսլամիստ-ծայրահեղականներին»,-ասաց բանախոսը:
Կարդացեք նաև
Խոսելով ԱՄՆ-Թուրքիա հարաբերությունների մասին՝ Ռուբեն Սաֆրաստյանը կարծիք հայտնեց, որ Թուրքիան կարեւոր տեղ կգրավի ԱՄՆ-ի քաղաքականության մեջ՝ մասնավորապես Մերձավոր Արեւելքում. «Թուրքիայի եւ ԱՄՆ-ի հարաբերությունները մոտ ապագայում կհիմնվեն այն փաստի վրա, որ Թուրքիան կարեւոր դեր ունի Մերձավոր Արեւելքում. այդ հարաբերությունները կդառնան ավելորդ զգացմունքայնությունից զերծ եւ ԱՄՆ-ի հետ կպահպանեն իրենց դաշնակցային բնույթը»:
Լուիզա ՍՈՒՔԻԱՍՅԱՆ
