«Ամերիկահայությունը պետք է գործ ունենա մի նախագահի հետ, որը ոչ մի առնչություն չի ունեցել որեւէ հայկական խնդրի հետ: Մեր խնդիրների հետ կապված նրա գիտելիքները շատ թույլ են, եթե առհասարակ գոյություն ունեն: Սա բացառիկ երեւույթ է եւ մարտահրավեր՝ ամերիկահայության եւ Հայաստանի համար»,-«Փաստարկ» մամուլի ակումբում այսօր անդրադառնալով Դոնալդ Թրամփի՝ ԱՄՆ նախագահ ընտրվելուն, ասաց թուրքագետ, արեւելագետ Ռուբեն Սաֆրաստյանը:
Նրա համոզմամբ՝ հայությունը պետք է կարողանա սեփական տեսակետները հասանելի դարձնել Թրամփի համար. «Տեղեկություն կա, որ Թրամփն իր մերձավորներին պատվիրել է իր համար պատրաստել կարճ տեղեկանքներ աշխարհի խնդիրների մասին՝ մինչեւ իր երդմնակալությունը: Այս փուլը մենք պետք է օգտագործենք՝ տեղեկանքներ հղելով Արցախի հարցի, Ցեղասպանության մասին»:
Թուրքագետի խոսքով՝ Թրամփի ադմինիստրացիան պետք է որոշակի մոտեցում ունենա Արցախի հարցի կարգավորման շրջանակում. «Այս առումով մեր տեսակետները պետք է հասանելի լինեն նրա ադմինիստրացիայի համար: Սա մարտահրավեր է մեզ համար: Թրամփը բիզնես-կապեր ունի նաեւ Էրդողանի ընտանիքի հետ, ինչը եւս մարտահրավեր է Հայաստանի համար»:
Սաֆրաստյանը չի կարծում, որ ԵԱՀԿ Մինսկի խմբի շրջանակում ԱՄՆ-ն առաջիկայում ակտիվություն կցուցաբերի, քանի որ Թրամփի ադմինիստրացիան դեռ պետք է ծանոթանա խնդրին:
Կարդացեք նաև
Լուիզա ՍՈՒՔԻԱՍՅԱՆ
