Այսօր կայացավ ուժային եռամարտի (պաուերլիֆտինգ) ֆեդերացիայի հիմնադիր նախագահ, ֆիզկուլտուրայի եւ սպորտի վաստակավոր գործիչ Ռազմիկ Այվազյանի անվան գավաթի առաջնությունը, որին մասնակցեցին Հայաստանի տարբեր մարզերի ու քաղաքների, Արցախի ուժեղագույն մարզիկները, այդ թվում նաեւ աշխարհի ու Եվրոպայի մրցանակակիրներ:
Երեք վարժությունների՝ սեղմում պառկած դիրքում, կանգնած դիրքից կքանիստ ձողով եւ ձգում, արդյունքների ամփոփումից հետո ըստ քաշային կարգերի հաղթեցին. 52 կգ՝ Արսեն Ոսկանյան, 56՝ Արմեն Գալստյան, 60՝ Արսեն Մրտեյան, 67՝ Արթուր Նաջարյան, 75՝ Յուրա Մայիլյան, 82՝ Թաթուլ Հարությունյան, 90՝ Արամ մելիքյան, 100՝ Արթուր Սարգսյան, 110՝ Հարություն Ավանեսյան, 125՝ Յուրի Կարաօղլանյան, +125՝ Սերգեյ Մադոյան: Թիմային հաշվարկով 1-ին տեղն զբաղեցրեց Պոլիտեխնիկական համալսարանի թիմը:
Պարգեւատրման արարողությանը ներկա ՀՀ սպորտի եւ երիտասարդության հարցերի նախարար Հրաչյա Ռոստոմյանը լրատվամիջոցներին ասաց. «Այս կարգի մարզաձեւերը ապահովում են մասսայական սպորտը եւ առողջ ապրելակերպը: Տեսեք, որքան գեղեցիկ եւ ուժեղ տղաներ են: Այս երիտասարդները առողջ ու դիմացկուն լինելով՝ պիտանի են մեր բանակին, ընդհանրապես՝ հասարակությանը: Հաշվի առնելով իրավիճակը մեր սահմաններում՝ պետք է մեր ազգը միշտ ուժեղ լինի:
Կարդացեք նաև
Մենք անպայման կօգնենք այս մարզաձեւին, կզարգացնենք այն բոլոր մարզերում, ինչու չէ՝ հնարավոր է նաեւ գյուղական համայնքներում, որտեղ երիտասարդ չկա, որ ուժեղ չլինի: Առավել եւս, որ դրա համար առանձնապես մեծ գումարներ ներդնելու անհրաժեշտություն չկա: Եվ ես ակնկալում եմ նաեւ ձեր՝ լրատվամիջոցների, աջակցությունը մասսայական սպորտի եւ առողջ ապրելակերպի քարոզչության հարցում»:
Աշոտ ՀԱԿՈԲՅԱՆ
