«Փաստարկ» մամուլի ակումբում այսօր Aravot.am-ը քաղաքագետ Հրանտ Մելիք-Շահնազարյանին խնդրեց մեկնաբանել ՀՀ նախագահ Սերժ Սարգսյանի՝ ռուսական լրատվամիջոցին տված հարցազրույցում հնչեցրած խոսքերը, թե «մի քանի անգամ Երևանը և Բաքուն մոտ են եղել պայմանագրի ստորագրմանը, որում կարող էին արտացոլվել հիմնական սկզբունքները: Դրանք են՝ հայկական կողմերը, այսինքն` Լեռնային Ղարաբաղը և Հայաստանը, թողնում են այն տարածքները, որոնք այսօր զբաղեցնում են որպես անվտանգության գոտի, այն տարածքները, որոնց մասին Ադրբեջանն ասում է, որ օկուպացված են»:
Մելիք-Շահնազարյանը նշեց, որ Ադրբեջանը դեմ է եղել Արցախի անկախության ճանաչմանը, խաղաղապահների տեղակայմանը. «Ի՞նչ են նրանք ուզում՝ ստանալ որոշակի տարածքներ, բայց առանց հստակ երաշխիքների, որ ճանաչելու են Արցախը, իսկ դա հայկական կողմի համար ընդունելի չի եղել: Ըստ պաշտոնական հայտարարությունների՝ հայկական կողմը մինչեւ ապրիլյան դեպքերը պատրաստ էր տարածքային զիջումների, բայց հասկանում էր, որ տարածքներ հանձնելու եւ Ադրբեջանին բավարարելու մեխանիզմներ գոյություն չունեն իրականում»:
Անդրադառնալով նույն հարցազրույցում խաղաղապահների մասին հնչեցրած մեկնաբանությանը, քաղաքագետը նկատեց, որ նախագահի պատասխանը սպառիչ է եղել: «Իհարկե, խաղաղապահների մասին զրույցներ մշտապես եղել են, բայց հաշվի առնելով, որ բանակցային գործընթաց չկա, այդ մասին խոսելը հիմա անտեղի է»,-կարծիք հայտնեց Հրանտ Մելիք-Շահնազարյանը:
Կարդացեք նաև
Լուիզա ՍՈՒՔԻԱՍՅԱՆ
