Նույն հիմնարկում աշխատող «մայր ու աղջիկ», «հայր ու տղա» երեւույթի դեմ պայքարը տարածվելու է մարզերի վրա:
Վարչապետ Կարեն Կարապետյանը վերջերս կառավարության նիստում կոշտ դիրքորոշում էր հայտնել հանրակրթական հաստատություններում՝ դպրոցներում, մանկապարտեզներում ազգակցական կապերի, հովանավորչության եւ շահերի բախման երեւույթների հետ կապված: Մասնավորապես, նա ասել էր, որ պետք է ստուգեն՝ մայր ու աղջիկ՝ նույն դպրոցում, որքանո՞վ է դա օբյեկտիվ:
Նույն մայր ու աղջկա սկզբունքով մարզպետարաններում, գյուղապետարաններում ու քաղաքապետարաններում են գործի տեղավորվել համայնքների ղեկավարների ազգուտակը: Օրինակ՝ վերջերս մամուլում աղմուկ բարձրացավ Արագածոտնի մարզպետ ՀՅԴ-ական Գաբրիել Գյոզալյանի հետ կապված, որն իրեն օգնական էր նշանակել իր հորեղբոր որդուն՝ Խաչիկ Գյոզալյանին, եւ վստահեցրել, որ նա խելացի, կրթված, պրոֆեսիոնալ անձնավորություն է, հարմար է այդ պաշտոնին:
Ուստի «Առավոտը» տարածքային կառավարման եւ զարգացման նախարար Դավիթ Լոքյանին հարցրեց՝ երբ դառնում են մարզպետ կամ համայնքապետ եւ իրենց ողջ ազգականներին տեղավորում են մարզպետարանում, գյուղապետարանում, Դուք նորմա՞լ եք վերաբերվում դրան: Նա պատասխանեց. «Ես այդ խնդիրը փորձում եմ առաջիկայում կանոնակարգել համապատասխան մեթոդական ցուցումներով: Մեխանիզմ կա»:
Թե որ մեխանիզմի մասին է խոսքը՝ Դավիթ Լոքյանը բացատրեց. «Համայնքը իր համայնքային ծառայողներին ձեւավորելու պարագայում, այսինքն՝ աշխատանքի ընդունելու պարագայում, պետք է առաջնորդվի հետեւյալ չափորոշիչներով՝ ինչ մասնագիտություն ունի, ինչ կրթություն ունի: Եթե ինքը հաշվապահ-ֆինանսիստ է, հետեւապես պետք է լինի բարձրագույն կրթությամբ հաշվապահ կամ տնտեսագետ: Եթե ինքը համայնքում անցնում է գլխավոր մասնագետի պաշտոնի համայնքային ծառայության, ինքը պետք է կոորդինացնի կրթության համակարգը, խոսքը մանկապարտեզի եւ արտադպրոցական հաստատությունների մասին է, ինքը պետք է ունենա մանկավարժի կրթություն կամ համապատասխան համարժեք կրթություն: Եթե մենք կդնենք այդ չափորոշիչները, եւ հանկարծ մի գյուղում կհայտնվի մի գյուղապետ, որի երեխան, աղջիկը կամ տղան բավարարում է այս չափանիշներին, բնական է, որ նրանք էլ կարող են աշխատել»:
Կարդացեք նաև
Նախարարն ասաց, որ մինչ օրս նման չափորոշիչներ չկան, եւ բաց դաշտ է ստեղծվում. «Համայնքային ծառայության մեջ նույնիսկ համայնքապետը կարող է միջնակարգ կրթությամբ լինել, աշխատակիցների համար հստակեցված չի: Բարձրագույն կրթությունը պարտադիր էր, բայց նեղ մասնագիտացումը՝ չէ: 2017-ի սկզբին մենք կկարգավորենք սա «Համայնքային ծառայության մասին» օրենքի փոփոխությամբ: Մենք հիմա զբաղվում ենք դրանով, որտեղ այս բոլոր խնդիրները կլուծվեն»:
Հ. ՋԵԲԵՋՅԱՆ
«Առավոտ»
18.11.2016
